19 iyul 2012 01:10
Fabio Kapello: Azərbaycan yığması çətin rəqibdi
Futbol üzrə Rusiya milli komandasının yeni baş məşqçisi Fabio Kapello bu ölkənin futbolundakı əsas problemi açıqlayıb. Azerisport.az xəbər verir ki, italiyalı mütəxəssis “Marca”ya açıqlamasında Rusiya Premyer Liqasındakı legionerlərin sayının çoxluğundan şikayətlənib.
İyulun 4-də Rusiya Futbol İttifaqı İcraiyyə Komitəsinin qəbul etdiyi qərara əsasən, şimal qonşularımızın çempionatında klublar start heyətində 7 əcnəbi oynada bilərlər. Əvvəllər isə 6 əcnəbinin ilk “11-lik”də çıxmasına icazə verilirdi. Kapellonun fikrincə, yeni qərar yığmadakı işinə çətinliklər yarada bilər. 66 yaşlı mütəxəssis komandanın uğursuzluğunu məhz Premyer Liqadakı legionerlər sayının çoxluğu ilə əlaqələndirib.
Kapello qarşısına qoyulmuş məqsədi də açıqlayıb. Onun sözlərinə görə, Rusiya millisi 2014-cü il dünya çempionatının seçmə mərhələsində Portuqaliya, İsrail, Şimali İrlandiya, Lüksemburq və Azərbaycan yığmalarının yer aldığı qrupdan Braziliyada təşkil olunacaq final mərhələsinə çıxmağı bacarmalıdır: “Rəqiblərimiz çətin olsa da, tam keçiləndi”.
