19 iyul 2012 17:58
UEFA Xəzər Lənkəranı Bakıya "göndərə" bilər
UEFA “Xəzər Lənkəran”ın Avropa Liqasındakı ev oyunlarını Lənkəran şəhər stadionunda qəbul etməsinə qadağa qoya bilər. Azerisport.az xəbər verir ki, artıq Polşanın “Lech” klubu ilə oyunla əlaqədar Lənkərana təşrif buyuran qitə futbol qurumunun nümayəndələri üzləşdikləri probmelərlə əlaqədar öz raportlarında qeydlər aparıblar.
UEFA nümayəndə heyətini narazı salan əsas məqamlardan biri Bakı beynəlxalq hava limanı ilə Lənkəran şəhər stadionu arasındakı məsafənin kifayət qədər uzaq olmasıdı. Məhz bu məqam UEFA-nın Lənkəran şəhər stadionuna qadağa qoyması üçün yetərli ola bilər.
Lakin maraq üçün qeyd edək ki, hazırda ölkəmizdə olan Polşa klubunun nümayəndə heyəti UEFA-ya bununla bağlı narazılıq etməyib. Onları narazı salan əsas məqam yalnız ölkəmizdə isti hava şəraitinin hökm sürməsidi.
Xatırladaq ki, “Xəzər Lənkəran” dörd il öncə “Lech”lə ev oyununu Tofiq Bəhramov adına Respublika stadionunda keçirmişdi. Ümid edək ki, UEFA rəsmilərinin əlində bayraq etməyə çalışdığı məsafə uzaqlığı xoşagəlməz qadağa ilə nəticələnməyəcək və komandamız elə bu mövsüm doğma arenasında daha bir və ya bir neçə klubu qəbul etmək şansı qazanacaq.
