20 iyul 2012 17:00
Tərlan Əhmədov: Biz hələ Jilina və Hapoel haqda düşünmürük
“Neftçi”nin məşqçisi Tərlan Əhmədov UEFA Çempionlar Liqasının üçüncü təsnifat mərhələsinin püşkatmasını dəyərləndirib. Azerisport.az xəbər verir ki, ikinci təsnifat mərhələsində Gürcüstan çempionu “Zestafoni”ni keçəcəkləri halda növbəti mərhələdə Slovakiya “Jilina”sı və ya İsrail “Hapoel”i (Kiryat Şmona) ilə qarşılaşmalı olacaq paytaxt klubunun rəsmisi bunları dilə gətirib:
“Potensial rəqiblərimizin güclü komandalar olduğunu hesab edirəm. Əlbəttə, bizə “Jilina” və “Hapoel”dən daha güclü rəqiblər də düşə bilərdilər. Amma bu komandalara qarşı oynaya bilərik. Lakin biz hələ növbəti mərhələdəki rəqiblərimizi düşünmürük. Hazırda bütün diqqətimizi “Zestafoni” ilə cavab matçına yönəltmişik. Çünki hələ növbəti mərhələyə vəsiqəni rəsmiləşdirməmişik. Yalnız gürcülərlə cavab oyunundan sonra növbəti mərhələ barədə düşünə bilərik”.
Qeyd edək ki, “Neftçi”nin “Zestafoni” ilə ilk oyunu 3:0 komandamızın xeyrinə başa çatıb. Cavab görüşü iyulun 24-də keçiriləcək. “Hapoel”lə “Jilina” arasındakı ilk oyunda isə slovaklar 1:0 hesabıyla üstün olmuşdular.
