22 iyul 2012 13:08
“Lech Xəzər Lənkəranın Nomme Kaljunu məhz səfərdə yenməsinə xüsusi diqqət yetirməlidi”
Polşanın “Lech” klubunun yarımmüdafiəçisi Bartoş Slusarki Avropa Liqasının ikinci təsnifat mərhələsində “Xəzər Lənkəran”a qarşı keçirdikləri ilk oyundan (1:1) sonra fikirlərini açıqlayıb. O, azerisport.az saytına müsahibəsində həm də növbəti mərhələyə adlamaq şanslarını dəyərləndirib.
“Çox çətin oyun alındı. Prinsipcə, biz bunu gözləyirdik. Amma gözlənilməz erkən qol buraxdıq. Bu, qətiyyən planlarımıza daxil deyildi. Hesab edirəm ki, top layiqli şəkildə qapımıza daxil oldu. Nə vaxt öz cərimə meydanında belə ardıcıl səhvlər buraxırsansa, başqa nəsə gözləməyə də dəyməz. Rəqib də məhz bundan sonra qapımıza yol tapmağı bacardı”.
Polşalı futbolçunun fikrincə, onun komandası Lənkəranda məğlubiyyətlə də üzləşə bilərdi: “Buraxdığımız qoldan sonra biz də fərqlənə bildik. Ən əsası isə oyunu bərabərləşdirməyi bacardıq. Məhz bundan sonra oyunumuz daha yaxşı alınmağa başladı. Fasiləyə qədər yenə qol vura bilərdik. Amma zərbələrdə dəqiqlik çatışmadı. Fasilədən sonra isə rəqib daha üstün oyun sərgilədi”.
Slusarski də digər komanda yoldaşları kimi ilk oyunun nəticəsindən razı qaldığını deyir: “Hesab edirəm ki, heç-heçə ilk oyunun ədalətli nəticəsidi. “Xəzər Lənkəran” çox yaxşı komandadı. Şəxsən mənim xoşuma gəldi. Amma bu, sadəcə ilk oyun idi. Hər şeyə Poznanda aydınlıq gələcək. Düşünmürəm ki, öz meydanımızda işimiz asan olacaq. Rəqibimizin heyətində bir neçə əla futbolçu çıxış edir. Onlar bizim kefimizi poza bilərlər. Məsələn, Eder Bonfim. Onunla beş il öncə Portuqaliyada birgə oynamışıq. Biz həmçinin rəqibimizin Estoniya “Nomme Kalju”su ilə oyunlarını da yaxşı xatırlayırıq. Hansı ki, onlarla da evdə heç-heçə edib, səfərdə qələbə qazanmışdılar. Bu fakta ciddi yanaşmaq lazımdı”.
“Lech”in orta sahə oyunçusu Lənkəran barədə də düşüncələrini dilə gətirib: “Bu səfər şəxsən məndə unudulmaz təəssürat yaratdı. Heç də ona görə yox ki, bu, həyatımda ən maraqlı bir səfər oldu. Sadəcə, bu şəhərdə olmaq maraqlı idi. Çünki belə şəhərlər paytaxtdan çox fərqlənirlər”.
