22 iyul 2012 19:41
Öncə Zestafoni, sonra Neftçi
UEFA Çempionlar Liqasının ikinci təsnifat mərhələsi çərçivəsində Gürcüstan çempionu “Zestafoni” ilə Azərbaycanın “Neftçi” komandası arasında keçiriləcək cavab matçı öncəsi mətbuat konfranslarının və son məşqlərin vaxtı müəyyənləşib. Azerisport.az xəbər verir ki, Zestafonidə baş tutacaq qarşılaşmadan bir gün öncə keçiriləcək mətbuat konfranslarında ilk olaraq meydan sahiblərinin çalışdırıcısı Georgi Çiabraşvili jurnalistlər önünə çıxacaq.
O, 20:30-da mətbuat nümayəndələrinin suallarını cavablandıracaq. Yarım saat sonra isə yetirmələrini son məşqə çıxaracaq. “Ağ-qaralar”ın məşqçisi Tərlan Əhmədov isə 21:30-da mətbuat konfransı keçirəcək. 22:00-da isə komandamız Zestafonidə son hazırlığını həyata keçirəcək.
Qeyd edək ki, bu komandalar arasında Bakıda keçirilən ilk oyunda “Neftçi” 3:0 hesablı qələbə qazanıb. Cavab oyunu isə iyulun 24-də “David Abaşidze” adına stadionda keçiriləcək və saat 22:00-da başlayacaq.
