23 iyul 2012 17:48
AZAL daha iki futbolçu aldı (FOTO)
Yeni mövsümün hazırlıqlarını davam etdirən AZAL daha iki futbolçu ilə müqavilə imzalayıb. Azerisport.az xəbər verir ki, Türkiyədə təlim-məşq toplanışında olan paytaxt klubu burdakı hazırlıq prosesində sınaqdan keçirilən Joze Junior Pereyra Aylton və Artur Patraşla münasibətlərini rəsmiləşdirib.
Qeyd edək ki, ampluaca müdafiəçi olan Ayltonla iki illik müqavilə imzalanıb. Yarımmüdafiəçi olan Patraşla isə bir illlik müqavilə bağlanıb.
Qeyd edək ki, 1988-ci ildə dünyaya gələn Artur Patraş 2006-2007 mövsümündə Moldovanın “Politexnika” klubunda çıxış etdikdən sonra (15 oyun, 2 qol) Rumıniyaya üz tutub. 2007-ci ildə “Timişoara” ilə müqavilə bağlayan futbolçu hələ də bu kluba məxsusdu (15 oyun, 1 qol). O, 2009-cu ildə Rumıniyanın “Otelul” (9 oyun), 2010-da “Konkordia” (12 oyun, 1 qol), 2011-də isə “Unirea” (8 oyun, 2 qol) icarəyə verilib.
Patraş Moldova millisinin üzvüdü. 2005-də U-17-nin (11 oyun, 2 qol), 2006-da U-19 (13 oyun, 5 qol), 2007-2009-da U-21-in (30 oyun, 7 qol) formasını geyinən 23 yaşlı futbolçu 2011-ci ildən A milliyə dəvət alır – 6 oyun. O, yığmanın son oyunlarına çağırılan futbolçular arasında olub.
Aylton isə 1987-ci il təvəllüdlüdü. Braziliyalı müdafiəçinin ilk klubu "Santos" olub. 2005-2007-ci illər aralığında bu komandada oynamış arxa xətt oyunçusu sonrakı iki mövsümü "Tupi"də keçirib. 2009-cu ildə isə onu Macarıstanın "Kaposvari" klubu transfer edib. Burda bir mövsüm keçirdikdən sonra o, bu ölkənin digər klubuna - "Ferencvaros"a keçib.
