23 iyul 2012 19:56
Xəzər Lənkəran üçün səfir dəstəyi (FOTO)
Xəbər verdiyimiz kimi, "Xəzər Lənkəran"ın Polşaya yollanmağı ilə əlaqədar planlarında bir sıra dəyişikliklər baş verib. Azerisport.az xəbər verir ki, çarter reysinin vaxtının dəyişilməsi səbəbindən komanda bu gün Bakıda qalmalı olub.
Polşanın Poznan şəhərinə uçuş sabah səhər saat 8:00 üçün nəzərdə tutulub. Reysin vaxtının dəyişdirilməsi oyunçuların hazırlıq prosesinə heç bir təsir etməyib. Belə ki, bu axşam saat 19:30-da komanda planlaşdırılan məşqini Bakıda keçirəcək.
Bu arada "Xəzər Lənkəran"ın Poznan şəhərində məskunlaşacağı "Andersiya" oteli artıq komandanın gəlişinə tam hazır vəziyyətdədi. Otelin qarşısında Azərbaycanın üçrəngli bayrağı dalğalanır, "Xəzər Lənkəran" bayrağı və klubun loqosunu isə otel binasının daxilində müxtəlif hissələrdə görmək mümkündü.
Həmçinin qeyd edək ki, “ağ-yaşıllar”ın Polşaya səfəri ilə Azərbaycanın bu ölkədəki səfirliyi yaxından maraqlanır. 26 iyulda Poznanda "Lech" klubuna qarşı keçiriləcək matçda Azərbaycanın Polşadakı Fövqaladə və Səalhiyyətli Səfiri Həsən Həsənov başda olmaqla səfirliyin işçi heyətinin komandamızı dəstəkləyəcəyi də gözlənilir.
