24 iyul 2012 11:07
Tərlan Əhmədov: Zestafoni zəif komanda deyil
“Neftçi”nin məşqçisi Tərlan Əhmədov UEFA Çempionlar Liqasının ikinci təsnifat mərhələsi çərçivəsində Gürcüstan çempionu “Zestafoni”yə qarşı keçirəcəkləri cavab matçı öncəsi fikirlərini açıqlayıb. Azerisport.az xəbər verir ki, o, Zestafonidə baş tutacaq qarşılaşma ilə bağlı öncə bunları dilə gətirib:
“İlk oyunda qazanılan 3:0 hesablı qələbə hər şey demək deyil. Düzdü, növbəti mərhələyə çıxmaq üçün yaxşı şans qazanmışıq. Ancaq bizi qarşıda daha bir oyun gözləyir”.
Tərlan Əhmədov komandasının səfər matçında da meydanda sonadək mübarizə aparmalı olduğunu bildirib: “Bu oyuna yaxşı hazırlaşmışıq. Düşünürəm ki, oyunun hər iki hissəsində rəqibə uduzmamalıyıq və 90 dəqiqə meydanda mübarizə aparmalıyıq. Tez-tez bizə növbəti rəqibiniz “Jilina”, yoxsa “Hapoel” olacaq?” sualı ilə müraciət edirlər. Ancaq biz hələ “Zestafoni” səddini keçməmişik. Bu oyundan sonra onlar haqda fikir yürütmək olar. Komandanın aparıcı futbolçusu Julius Vobaya gəldikdə isə o böyük potensiala malikdir. Lakin məncə, Vobay ilk oyunda bütün bacarığını ortaya qoya bilmədi”.
“Neftçi”nin məşqçisi “Zestafoni”nin zəif komanda olması haqda deyilən fikirlə razılaşmayıb: “Zestafoni”nin zəif komanda olması haqda ilk dəfə eşidirəm. Ancaq mən bu fikirlə razılaşmıram. Düşünürəm ki, bu gün Qafqazın iki güclü komandası üz-üzə gələcək. İnanıram ki, rəqib futbolçular da doğma meydanda xarakter nümayiş etdirməyə çalışacaqlar”.
Qeyd edək ki, bu komandalar arasında Bakıda keçirilən ilk oyunda “Neftçi” 3:0 hesablı qələbə qazanıb. Cavab oyunu isə iyulun 24-də “David Abaşidze” adına stadionda keçiriləcək və saat 22:00-da başlayacaq.
