25 iyul 2012 02:43
Sumqayıt Cihanın komandası ilə sülhə razılaşdı (YENİLƏNİB)
Türkiyədə təlim-məşq toplanışda olan "Sumqayıt" qardaş ölkədəki hazırlıq prosesi çərçivəsində bu gün ilk yoxlama matçına çıxıb. Azerisport.az xəbər verir ki, baş məşqçi Bernard Raab yetirmələrini Türkiyə təmsilçisi ilə görüşdə sınayıb.
Belə ki, rəqib "Kayseri Erciyesspor" klubu idi. Bu komanda son mövsümdə TFF birinci liqada 18 komanda arasında 8-ci olub. Hansı ki, heyətində bu yay komandadan uzaqlaşdırılan Amit Quluzadə çıxış edirdi. Hazırda isə bu komandanın sıralarında millimizin hücumçusu Cihan Özkara yer almaqdadı.
Maraqlı idman mübarizəsi şəraitində keçən görüş 2:2 hesablı bərabərliklə yekunlaşıb. Oyunda ilk qolu "Kayseri Erciyesspor" vurub. Qarşılaşmanın 16-cı dəqiqəsində Ceyhun Sultanovun ötürməsindən sonra Pərdis Fərcad-Azad başla hesabı bərabərləşdirib. İkinci hissəyə də sürətli başlayan komandamız debütdəcə hesabda irəli çıxıb. Bu dəfə Ceyhun Sultanovun ötürməsini Uğur Pamuk lazımınca dəyərləndirib. İlk saatın tamamında "Kayseri Erciyesspor" daha bir dəfə fərqlənərək oyunun hesabını rəsmiləşdirib.
Qeyd edək ki, millimizin hücumçusu Cihan Özkara da bu qarşılaşmada forma geyinib.
"Sumqayıt" FK Türkiyədə daha iki yoxlama oyunu keçirəcək. İyulun 26-da "Kayserispor"la üz-üzə gələcək Bernard Raabın komandası iyulun 28-də "1461 Trabzon" klubunu sınağa çəkəcək.
Yoxlama oyunu
24 iyul
SUMQAYIT – KAYSERİ ERCİYESSPOR - 2:2 (1:1)
"Sumqayıt" oyuna bu heyətlə çıxıb: Səlahət Ağayev, Samir Abasov, Murad Doymuş, Slavik Alxasov, Məhəmməd Əli Atam, Orxan Əliyev, Murad Ağayev, Uğur Pamuk, Emin Cəfərquliyev, Ceyhun Sultanov, Pərdis Fərcad-Azad.
Oyuna sonradan daxil olanlar: Aftandil Hacıyev, Ramil Həşimzadə, Sabir Allahquliyev, Məhəmməd Mirzəbəyov, Aqşin Muxtaroğlu.
Oyun başladı
6-cı dəqiqədə türklər hesabı açırlar - 0:1
16-cı dəqiqədə Samir Abbasovun dəqiq zərbəsi ilə hesab bərabərləşir - 1:1
Birinci hissə başa çatdı
İkinci hissə başladı
47-ci dəqiqədə Uğur Pamuk “Sumqayıt”ı hesabda önə keçirir – 2:1
60-cı dəqiqədə Türkiyə klubu hesaba tarazlıq gətirir – 2:2
Matç başa çatdı
