26 iyul 2012 00:01
Rəvan Türkiyə klubu ilə sülh bağladı (YENİLƏNİB)
Yeni mövsümün hazırlıqlarını Türkiyədə davam etdirən “Rəvan” təlim-məşq toplanışı çərçivəsində növbəti yoxlama matçını keçirib. Azerisport.az xəbər verir ki, paytaxt klubunun baş məşqçisi Güler Cavad yetirmələrini Türkiyənin “Bucaspor” klubu ilə görüşdə sınayıb.
Qeyd edək ki, bu komanda TFF birinci liqasında çıxış edir. “Bucaspor” qardaş ölkə birinciliyinin son mövsümündə 18 komanda arasında 12-ci olub.
"Rəvan"ın bu komanda ilə görüşü isə sülhlə başa çatıb. Hesabı 5-ci dəqiqədə məhz "sarı-qırmızılar" açıblar. Amma komandamız bu üstünlüyünü elə ilk yarıda əldən verib. 37-ci dəqiqədə türklər hesabı bərabərləşdiriblər. Fasilədən sonra başqa qol vurulmayınca, qarşılaşma elə 1:1 bitib.
Xatırladaq ki, “Rəvan” Türkiyədəki ilk matçında Səudiyyə Ərəbistanının “Najran” klubunu 2:1 hesabı ilə məğlub etmişdi. Türkiyənin “Kayseri Karabükspor”, eləcə də “Göztepe” klubları ilə görüşlərdə isə hesabı açılmamışdı – 0:0. Türkiyə Superliqasında çıxış edən “Eskişehirspor”la görüş isə 0:4 hesablı darmadağınla bitmişdi.
Yoxlama oyunu
25 iyul
BUCASPOR – RƏVAN - 1:1 (1:1)
