25 iyul 2012 03:24
Xəzər Lənkəranın polşalı yeni üzvü: Lech üçün çətin olacaq
UEFA Avropa Liqasının ikinci təsnifat mərhələsində Polşa “Lech”i ilə cavab matçına hazırlaşan “Xəzər Lənkəran”ın bu ölkədəki ilk məşqində yeni simaya da rast gəlmək olardı. Azerisport.az xəbər verir ki, bu, komandaya baxışa dəvət olunan polşalı legioner Lukaş Madeydi.
30 yaşlı futbolçu artıq “ağ-yaşıllar”la məşqlərə də başlayıb. Qeyd edək ki, bu futbolçu peşəkar karyerasına 1996-cı ildə “Lodz”da başlayıb və 2000-ci ilə qədər bu komandada cəmi 18 oyun (2 qol) keçirib. 2001–2002 mövsümündə isə “Ruch”un şərəfini qoruyub (25 oyun, 1 qol). 2002-2004-cü illər aralığında o, transfer olmaq istədiyi “Xəzər Lənkəran”ın hazırkı rəqibi – “Lech”də çıxış edib (63 oyun, 6 qol). 2005-ci ildə “Gornik”ə keçən Madey 17 oyuna 1 qol vurub. 2006-cı ildə yenidən “Lodz”a qayıdan yarımmüdafiəçi 2008-ci ilə qədər bu komandada 57 oyuna 11 qolla yadda qalıb. 2008-2009 mövsümündə onu Portuqaliyanın “Academica” klubu alıb. Amma burdakı karyerası çox uğursuz alınıb (cəmi 6 oyun).
“Ağ-yaşıllar”ın maraqlandığı futbolçu 2009-cu ildən etibarən isə “Slask”da çıxış edir. Hansı ki, son mövsümdə bu komanda ilə Polşa çempionu adını qazanıb. O, bu komandada 60 oyun keçirib, 7 qol vurub. Madey Polşa millisində də üç oyuna çıxıb.
Məşq zamanı o, azerisport.az saytının müxbiri ilə söhbətləşməyə də imkan tapıb, Bakı və Lənkəranla maraqlanıb, həmçinin suallarımızı cavablandırıb. O, “Lech”in qapıçısı Kriştof Kotorovski ilə yaxından tanış olduğunu deyir: “Lech”də iki il keçirmişəm. Uzun müddətdi Kotorovski ilə dostam. Son mövsümü isə “Slask”da keçirmişəm. Amma “Xəzər Lənkəran” variantı ortaya çıxdı. Burda yaxşı futbolçular cəmləşib. Baxaq, görək burda möhkəmlənə biləcəyəmmi”.
Madey “Xəzər Lənkəran”ın “Lech”lə oyunda şanslarından da danışıb: “Poznanlıları məğlub etmək asan olmayacaq. Amma onlar üçün də çətin olacaq. “Xəzər Lənkəran” öz gücünü ilk oyundaca göstərib. Fikrimcə, şanslar az da olsa var. Qələbə qazanmaq olar. Əgər komandanız öz qapısını 70 dəqiqə toxunulmaz saxlasa, “Lech”in problemləri olacaq. Buna görə də qol vurmaq lazımdı”.
Lakin Yunis Hüseynov ilk məşqdə Madeyi o qədər də bəyənməyib. “Ağ-yaşıllar”ın çalışdırıcısı hər ehtimala qarşı ona daha bir şans vermək istəyir: “Mümkündü ki, axşam məşqində onu bir daha sınayaq”.
