25 iyul 2012 16:26
Neftçinin növbəti rəqibini daha yaxından tanıyaq
Ötən gün “Neftçi”nin UEFA Çempionlar Liqasının üçüncü təsnifat mərhələsindəki rəqibi müəyyənləşdi. Azerisport.az xəbər verir ki, Gürcüstan çempionatının son qalibi “Zestafoni”ni sıradan çıxaran (3:0, 2:2) Azərbaycan çempionu növbəti mərhələdə İsrailin “Hapoel” (İroni Kiryat Şmona) klubu ilə qarşılaşacaq.
İsrail çempionu ikinci təsnifat mərhələsində Slovakiyanın “Jilina” klubundan üstün olub. İlk oyunda 0:1 hesabıyla uduzmasına rəğmən, doğma meydanda qazanılan 2:0 hesablı qələbə ümumi zəfər üçün yetərli olub.
İroni Kiryat klubu 2000-ci ildə yaradılıb. Kiryat-Şmonanı təmsil edən komandalar – “Hapoel” və “Maccabi” 2000-ci ilə qədər İsrail çempionatının aşağı dəstələrində oynayıb. Həmin il “İturan” şirkətinin sahibi, iş adamı İzzi Şeratski hər iki komandanı satın alıb və onları birləşdirib. “Hapoel” 2006-07-ci il mövsümündə İsrail çempionatının yüksək liqasına vəsiqə qazanmağı bacarıb. 2008-09-cu il mövsümündə Kiryat-Şmona təmsilçisi yüksək liqada yerini itirib, növbəti – 2009-10-cu il mövsümündə isə yenidən elitaya qayıdıb.
“Hapeol” bundan əvvəl cəmi bir dəfə avrokuboklarda iştirak edib. 2008-2009 mövsümündə UEFA Kubokunda çıxış edən komanda birinci təsnifat mərhələsində Çernoqoriyanın “Mogren” klubunu mübarizədən kənarlaşdırsa da (1:1, 3:0), ardınca Bolqarıstanın “Litex” klubuna yenilib (0:0, 1:2).
“Neftçi”nin rəqibi tarixi ərzində cəmi bir dəfə ölkə çempionu olub. Komanda başa çatan mövsümdə Təl-Əviv “Hapoel”ini 14 xal geridə qoyaraq çempionluğu bayram edib.
İsrailin son çempionunun heyətində 3 legioner forma geyinir. Bunlar makedoniyalı Darko Tasevski, amerikalı Brayan Qerziciç və serb Duşan Matoviçdi.
“Hapeol” ev oyunlarını Kiryat Şmonadakı 5300 azarkeş tutumlu “Municipal” stadionuda keçirir. Lakin həmin stadion UEFA-nın tələblərinə cavab vermədiyi üçün, komanda avrokuboklardakı rəqiblərini başqa şəhərdə - Hayfada qəbul edir.
Komandanın baş məşqçisi Gili Landaudu. Bu ildən komandaya başçılıq edən 54 yaşlı israilli mütəxəssis əvvəllər İsrailin müxtəlif klublarında çalışıb.
Qeyd edək ki, bu komandaların birinci oyunu İsrailin Hayfa şəhərindəki “Kiryat-Eliazer” stadionunda baş tutacaq. Matç yerli vaxtla saat 19:30-da (Bakı vaxtı ilə saat 21:30-da) başlayacaq.
Cavab qarşılaşması isə avqustun 7-də Bakıda, “Dalğa Arena”da keçiriləcək. Böyük ehtimalla həmin görüş saat 21:00-da start götürəcək. Amma hələlik bu barədə rəsmi açıqlama verilməyib.
