25 iyul 2012 17:43
Radomir Todorov: Lech səddini keçməyi çox istəyirik
“Xəzər Lənkəran”ın müdafiəçisi Radomir Todorov UEFA Avropa Liqasının ikinci təsnifat mərhələsi çərçivəsində Polşanın “Lech” klubuna qarşı keçirəcəkləri cavab matçı öncəsi fikirlərini açıqlayıb. Azerisport.az saytına müsahibəsində o, Poznanda baş tutacaq qarşılaşma ilə bağlı öncə bunları dilə gətirib:
“Digər oyunçularımız kimi, mən də özümü yaxşı hiss edirəm. Fikrimcə, oyuna hazıram. Oyuna çıxacağımız anı gözləyirəm. İlk oyundan sonra “Lech”in müəyyən üstünlüyü var. Amma bu, elə də çox deyil”.
Todorov Polşa təmsilçisinin güclü azarkeş dəstəyinə malik olmasına dair sualımızı belə cavablandırdı: “Əlbəttə, doğma azarkeşlərin gözü qarşısında oynamaq tam fərqlidi. “Lech”in azarkeşləri stadionda əla atmosfer yaradırlar. Dolu tribunalar qarşısında mübarizə aparmaq çox xoş olur. Xüsusilə də meydan sahibləri üçün. Amma oyun zamanı “Lech”in azarkeşləri barədə düşünməyəcəyik. Şəxsən mənə onların heç bir təsiri olmayacaq. Sakit olacağam”.
Todorov dörd il öncə “Lech”ə uduzduqları oyunu da yada salıb: “Həmin oyunda meydanda olanlardan biri də mən idim. O oyundakı atmosferi yaxşı xatırlayıram. Baxmayaraq ki, stadionda yenidənqurma işləri aparılırdı, tribunalar tam dolmuşdu”.
“Xəzər Lənkəran”ın müdafiəçisi indiki durumlarını vaxtilə Xorvatiya “Dinamo”suna (Zaqreb) rəqib olduqları dövrlər müqayisə edib. Xatırladaq ki, həmin vaxt “ağ-yaşıllar” xorvatlarla da evdə 1:1 hesablı sülhə razılaşmışdılar: “Siuasiya oxşardı. Pis oynamadıq, qol vurduq. Amma sonunu gətirə bilmədik. Elə “Lech”lə əvvəlki səfər matçını da qeyd etmək olar. Revanş səs-küylü sözdü. Amma təbii ki, biz “Lech” səddini keçməyi çox istəyirik. Fikrimcə, bütün Azərbaycan bu komandanı keçməyimizi gözləyir. Çünki “Xəzər Lənkəran” da daxil olmaqla hələ heç bir klubumuz bunu bacarmayıb”.
Bolqar futbolçu həmçinin növbəti mərhələdəki potensial rəqibləri barədə də danışıb: “İslandiya təmsilçisi (Hafnarfyordur) ilə oynamağımızı istərdim. Ona görə yox ki, onlar İsveç klubundan (AİK) zəifdilər. Sadəcə, “Hafnarfyordur”un dişimizə görə rəqib olduğunu düşünürəm. Lakin hələ buna nail olmaq üçün “Lech”i yolumuzdan kənarlaşdırmalıyıq”.
Qeyd edək ki, bu komandalar arasında Lənkəranda keçirilən ilk oyunda 1:1 hesablı heç-heçə qeydə alınmışdı. Cavab oyunu isə iyulun 26-da Poznandakı “Mieyski” stadionunda keçiriləcək və saat 23:00-da başlayacaq.
