25 iyul 2012 20:47
Asteras – İnter matçında anşlaq olacaq (FOTO)
UEFA Avropa Liqasının ikinci təsnifat mərhələsinin cavab qarşılaşması çərçivəsində keçiriləcək "Asteras" - "İnter" matçının biletlərinin iyulun 23-dən satışa çıxarıldığını xəbər vermişdik. Azerisport.az xəbər verir ki, qiyməti 15 və 25 avro olan biletlər şəhərin iki yerində satılır.
Son məlumatlara əsasən artıq biletlərin 70 faizi satılıb və qarşılaşmanın startına kimi bütün biletlərin satılacağı bildirilir. Beləliklə, sabah baş tutacaq "Asteras " - "İnter" matçında anşlaq gözlənilir.
Oyunu izləyənlər arasında azərbaycanlı fanatlar da olacaq. Belə ki, qarşılaşmanı Bakıdan gedən "İnter"in azarkeşləri, eləcə də yerli jurnalistlər də izləyəcəklər.
Əlavə edək ki, Tripolis şəhərinin demək olar ki, bütün küçələrində "Asteras" - "İnter" görüşünün afişalarına rast gəlmək olar.
Xatırladaq ki, oyunun keçiriləcəyi “Asteras Tripolis Stadium” 7500 azarkeş tutumuna malikdi. Qarşılaşma sabah Bakı vaxtı ilə saat 22:00-da start götürəcək.
