25 iyul 2012 00:27
Tərlan Əhmədov: Göstərdik ki, Neftçi də komanda oyunu sərgiləyə bilir
“Neftçi”nin məşqçisi Tərlan Əhmədov UEFA Çempionlar Liqasının ikinci təsnifat mərhələsi çərçivəsində Gürcüstan çempionu “Zestafoni”yə qarşı keçirdikləri cavab matçı ilə bağlı fikirlərini açıqlayıb. Azerisport.az xəbər verir ki, o, Zestafonidə baş tutan qarşılaşma ilə bağlı bunları dilə gətirib:
“Bilirdik ki, çətin olacaq. İlk oyunda böyük hesabla qələbə qazansaq da, cavab görüşünə ciddi yanaşırdıq. Biz bu oyunda bir daha göstərdik ki, “Neftçi” komanda futbolu sərgiləməyi bacarır. Amma etiraf edim ki, biz rəqibi Bakıdakı oyunda daha çox fərdi keyfiyyətlərimiz sayəsində məğlub edə bilmişdik. Bizə daha yaxşı oyun sərgiləmək üçün vaxt lazımdı. Bu gün də ilk 25 dəqiqədə öz oyunumuzu tapa bilmədik. Amma sonradan hər şey qaydasına düşdü. Şadam ki, Gürcüstan çempionunu mübarizədən kənarlaşdıra bildik”.
Qeyd edək ki, bu komandalar arasında Bakıda keçirilən ilk oyunda “Neftçi” 3:0 hesablı qələbə qazanmışdı. Cavab oyunu isə 2:2 hesabıyla başa çatdı və komandamız mərhələ adladı.
