27 iyul 2012 03:11
Qəbələ son oyununda da məğlub oldu (YENİLƏNİB)
Sloveniyada təlim-məşq prosesini davam etdirən “Qəbələ” bu gün ölkə xaricindəki hazırlıq prosesi çərçivəsində son yoxlama görüşünə çıxıb. Azerisport.az xəbər verir ki, baş məşqçi Fatih Kavlak komandasını Türkiyə klubu ilə qarşılaşmada sınaqdan keçirib.
Belə ki, rəqib “Mersin İdmanyurdu” klubu olub. Türkiyənin Mersin şəhərini təmsil edən klubun əsası 1925-ci ildə qoyulub. Komanda Türkiyə Super Liqasında mübarizə aparır.
Matç tərəflərin bərabər mübarizəsi şəraitində start götürüb. İlk hissədə “Qəbələ” bir neçə əlverişli qol epizodu yaratsa da, istəyinə çata bilməyib. Əvəzində rəqib hesabı öz xeyrinə dəyişə bilib və komandalar fasiləyə “Mersin İdman Yurdu”nun üstünlüyü ilə yollanıblar.
İkinci hissə də eyni ssenari üzrə davam edib. 45 dəqiqə ərzində hər iki tərəfin fərqlənmək imkanları olsa da, hissə əsasən iki penalti zərbəsi ilə yadda qalıb. İkinci yarının əvvələrində Türkiyə təmsilçisi 11 metrlik zərbə vurmaq hüququ qazanıb və hesab arasındaki fərqi artırıb. 75-ci dəqiqədə isə Mendiyə qarşıya cərimə meydançası daxilində kobudluq hakimin penalti nöqtəsini göstərməsi ilə nəticələnib. Topa yaxınlaşan Dodo qapıçı səddini aşa bilməyib və matç rəqibin 2:0-lıq qalibiyyəti ilə sona çatıb.
Qeyd edək ki, “Qəbələ” Sloveniyadakı ilk yoxlama oyununu Çexiya təmsilçisi “MFK Karvina”ya qarşı keçirmişdi və 0:1 hesabıyla məğlub olmuşdu. Serbiya klubları - “İndiya” (0:2), “Rad” (1:2) və “Borca” ilə görüşlər də məğlubiyyətlə başa çatmışdı.
Yoxlama oyunu
26 iyul
QƏBƏLƏ – MERSİN İDMANYURDU - 0:2
"Qəbələ" qarşılaşmada aşağıdakı heyətlə mübarizə aparıb:
Dieqo Koşta Silva, Ürfan Abbasov, Nodar Məmmədov, Deyan Kelhar, Omar Kalabane, Vurğun Hüseynov (Viktor Mendi), Rəşad Abdullayev, Elmar Baxşıyev (Bruno da Silva), Aleksandr Çertoqanov, Viktor Mendi, Luis Hilario Dodo , Yannik Kamanan (Daniel Kruz).
