26 iyul 2012 00:16
Leandro Alvares: Şanslar 70-in 30-a bizim xeyrimizədi
Yunanıstanın “Asteras” klubunun futbolçusu Leandro Alvares UEFA Avropa Liqasının ikinci təsnifat mərhələsi çərçivəsində Bakı “İnter”inə qarşı keçirəcəkləri cavab matçı öncəsi fikirlərini açıqlayıb. Azerisport.az saytına müsahibəsində o, Tripolisdə baş tutacaq qarşılaşma ilə bağlı öncə bunları dilə gətirib:
“Əlbəttə, ilk oyundakı 1:1 hesablı heç-heçə məhz “Asteras”ı qane edir. Çünki səfərdə vurulan hər qolun öz çəkisi var. Amma unutmaq olmaz ki, qarşıda daha çətin 90 dəqiqə var. Ona görə də sakitləşmək olmaz. Hesab edirəm ki, şanslar 70-in 30-a bizim xeyrimizədi. Matçın doğma divarlar arasında keçirilməsi də “Asteras”a üstünlük qazandırır. Onu da gözəl başa düşürük ki, vurulacaq hər qol cütün taleyini həll edə bilər. “İnter” heç də zəif komanda deyil. Onlara qarşı oynamaq heç də asan deyildi. Amma ümid edirəm ki, cavab matçında rəqibə çox hərəkət etməyə imkan verməyəcəyik”.
Qeyd edək ki, bu komandalar arasında Bakıda keçirilən ilk oyunda 1:1 hesablı heç-heçə qeydə alınmışdı. Cavab oyunu isə iyulun 26-da Tripolisdəki “Asteras Tripolis” stadionunda keçiriləcək və saat 22:00-da başlayacaq.
