26 iyul 2012 00:37
Adrian Pit: Xəzər Lənkəran və Lech eyni səviyyəli komandadı
“Xəzər Lənkəran”ın yarımmüdafiəçidi Adrian Pit UEFA Avropa Liqasının ikinci təsnifat mərhələsi çərçivəsində Polşanın “Lech” klubuna qarşı keçirəcəkləri cavab matçı öncəsi fikirlərini açıqlayıb. Azerisport.az saytına müsahibəsində o, Poznanda baş tutacaq qarşılaşma ilə bağlı bunları dilə gətirib:
“Mən inanıram ki, növbəti mərhələyə keçəcəyik. “Lech”lə oyun çətin olacaq. Amma bizim üçün heç bir oyun asan keçmir. Əgər özümüzü zəif komanda hesab etsək, onda qələbə qazana bilmərik. Hesab edirəm ki, “Xəzər Lənkəran”la “Lech” eyni səviyyəli komandadı. Əla kollektivimiz var və polşalıları səfərdə məğlub edə bilərik. Bütün oyunçularımız özlərini yaxşı tərəfdən göstərməlidilər. Bir-iki nəfərlə nəyəsə nail olmaq mümkünsüzdü. Futbol komanda oyunudu. Lənkərandakı oyunda hava şəraiti faciəvi idi. Mən artıq ilk dəqiqələrdən yorulmuşdum. İndi bizi tamamilə fərqli şərtlər, stadion, qazon gözləyir. Özümü daha yaxşı hiss edirəm”.
Pit ilk oyunda əlinə düşən əla qol vəziyyətini boşa verdiyi epizodda səhvini etiraf edir: “Hesab edirəm ki, buna görə məni tənqid edənlər haqladılar. Qol vurmağa borclu idim. Çünki buna çox yaxın idim. Fikrimcə, cavab oyununda bunun öhdəsindən gələ biləcəyəm”.
Qeyd edək ki, bu komandalar arasında Lənkəranda keçirilən ilk oyunda 1:1 hesablı heç-heçə qeydə alınmışdı. Cavab oyunu isə iyulun 26-da Poznandakı “Mieyski” stadionunda keçiriləcək və saat 23:00-da başlayacaq.
