26 iyul 2012 12:36
Neftçi transfer bombasını partlatmağa hazırlaşır
Azərbaycan çempionu bu yay səs-küylü bir transfer həyata keçirməyə hazırlaşır. Azerisport.az xəbər verir ki, paytaxt klubu Portuqaliyanın “Uniao Leyria” klubunun braziliyalı hücumçusu Bruno Moraesi heyətinə qatmaq fikrindədi.
Qeyd edək ki, bu futbolçu peşəkar karyerasında 2002-ci ildə “Santos”da başlayıb. Amma doğma klubunda cəmi 2 oyuna çıxan forvard 2003-cü ildə Portuqaliyanın “Porto” klubuna transfer olunub. O, 2010-cu ilə qədər qaldığı “Porto”da cəmi 14 oyun keçirib, 2 qol vurub. Çünki bu müddət ərzində üç dəfə başqa klublara icarəyə verilib. 2004-2005 mövsümündə “Vitoria Setubal” onu heyətinə qatıb – 24 oyun, 5 qol. 2008-ci ildə bu komanda onu bir daha icarəyə götürsə də, bu dəfə Moraesin çıxışı daha uğursuz alınıb – cəmi 3 oyuna çıxan futbolçu geri qaytarılıb. 2010-cu ildə isə “Rio Ave” bu hücumçunun xidmətində maraqlı olub 8 oyun.
Elə həmin il “Porto” ilə anlaşması başa çatan hücumçu “Gloria”ya transfer olunub. Bu klubda 12 oyun keçirdikən sonra növbəti il “Naval”a keçib (9 oyun, 3 qol). Onun son iş yeri isə qeyd etdiyimiz kimi, “Uniao Leiria” olub. Bu komandada 18 oyun keçirmiş futbolçu 6 dəfə rəqib qapılarına yol tapıb.
28 yaşlı futbolçu potensialı açılmamışlardan hesab olunur. O, “Porto”da Joze Mourinyonun rəhbərliyi altında bir sıra uğurlar da qazanıb. Belə ki, 2003–04 və 2006–07 mövsümlərində Portuqaliya çempionu olan braziliyalı 2004–05-də də ölkə kubokuna sahib çıxıb. Onun ən böyük uğuru isə şübhəsiz "Porto" ilə Çempionlar Liqasının qalibi olmasıdı.
Qeyd edək ki, “Neftçi” bu futbolçunun transferini həll edə bilsə, onun xidmətindən elə Çempionlar Liqasının üçüncü təsnifat mərhələsində İsrail “Hapoel”i ilə oyunlarda yararlana biləcək. Amma bu, iyulun son günlərinədək həllini tapmalıdı.
