27 iyul 2012 13:29
“İnter Maritimodan zəif komanda deyil”
Yunanıstanın “Asteras” klubunun baş məşqçisi Sakis Tsiolis UEFA Avropa Liqasının ikinci təsnifat mərhələsi çərçivəsində Bakı “İnter”inə qarşı keçirdikləri cavab matçından sonra azerisport.az saytının suallarını cavablandırıb. O, Tripolisdə baş tutan həlledici qarşılaşma ilə bağlı öncə bunları dilə gətirib:
“Əlbəttə, penalti lotereyadı. Amma biz buna da hazırlaşmışdıq. Mən bilirdim ki, bu oyunda hər şey ola bilər. Ona görə qələbəyə də inanırdım”.
Tsiolis “İnter”i məğlub etmələrinə rəğmən, rəqibin ünvanına xoş sözlər səsləndirib: “Mən “İnter”in hələ ötün mövsüm ərzindəki oyunlarını da izləmişdim. Əlbəttə, ola bilər ki, siz buna inanmazsınız, amma mən Azərbaycan klubunu növbəti mərhələdəki rəqibimiz – Portuqaliya “Maritimo”sundan zəif hesab etmirəm”.
“Asteras”ın baş məşqçisi “bankirlər”in Yunanıstan çempionatında neçənci yeri tuta biləcəyinə dair suala belə cavab verib: “İnter” həqiqətən əla komandadı. Onlar çox güclüdülər. Fikrimcə, bakılılar asanlıqla Yunanıstan Super Liqasında medallar uğrunda mübarizə apara bilərlər. İstənilən halda onların ilk dördlükdəki yerlərinə zəmanət vermək olar”.
O, “İnter” üzərindəki zəfərin sirrini də açıqlayıb: “Oyundan öncə yetirmələrimə dedim ki, təsəvvür edin, bu, final oyunudu. Şadam ki, mənim həmin sözlərim uşaqlara çatdı”.
Qeyd edək ki, bu komandalar arasında Bakıda keçirilən ilk oyunda 1:1 hesablı heç-heçə qeydə alınmışdı. Cavab oyununda isə qalibi penaltilər müəyyənləşdirdi və yunanlar daha güclü oldular – 1:1, 2:4.
