27 iyul 2012 18:11
Xorvatiya millisinin sabiq üzvü Azərbaycan klubunda
“Simurq” daha bir əcnəbi oyunçu ilə anlaşıb. Azerisport.az xəbər verir ki, Zaqatala klubu Stepan Polyakla ilkin razılığa gəlib.
Avstriyada təşkil olunmuş təlim-məşq toplanışında baxışa dəvət olunmuş xorvat futbolçu baş məşqçi Georgi Çixradzenin inamını qazandığına görə komandada saxlanılıb. 29 yaşlı yarımmüdafiəçi növbəti həftə Azərbaycana gələrək “Simurq”la rəsmi müqaviləyə imza atacaq.
Qeyd edək ki, Stepan Polyak karyerası ərzində vətənində “İnter” və Zaqreb “Dinamo”sunun formasını geyinib. Peşəkar karyerası ərzində isə 28 yaşlı orta xətt oyunçusu “İnter” (Xorvatiya, 2002-2006, 63 oyun, 8 qol), “Slaven” (Xorvatiya, 2006-2008, 50 oyun, 10 qol), “Eskişehirspor” (Türkiyə, 2008-2010, 30 oyun) və “Slaven” (Xorvatiya, 2010-2012, 44 oyun, 2 qol). Stepan Xorvatiya U-17-sinin formasını geyinib. O, 1999-cu ildə 3 dəfə milli komandaya çağırıb.
