27 iyul 2012 19:16
“Yeni mövsümdə fərqli Turan görəcəyik”
Azərbaycan Premyer Liqasında yeni mövsümün başlamasına az bir vaxt qalmış komandalar hazırlıqlarını yekunlaşdırmağa başlayıblar. Azerisport.az xəbər verir ki, “Turan” da heyətini formalaşdırmağa davam edir:
"Turan"ın mətbuat xidmətinin rəhbəri Süleyman Tağıyev PFL-in rəsmi saytına açıqlamasında bunları dilə gətirib: "Komanda gündə iki dəfə, əsasən, səhər fiziki, axşam isə topla məşq edir. Ancaq yoxlama oyunları keçirməkdə problemlər yaşayırıq. İndiyə kimi yalnız “Göyəzən”lə yoxlama oyunu keçirsək də, başqa rəqib tapa bilmirik, vaxt da az qalıb".
"Mətbuatda yoxlama oyunu üçün Bakıya yollanacağımızla bağlı məlumatlar yer alsa da, bu doğru deyil. Bizə yaxın olan “Şəmkir” və “Karvan”la da yoxlama oyunu keçirə bilmirik. Bunun səbəbi isə həmin komandaların hələ yığılmamasıdır. Bütün bunlara baxmayaraq “Turan” hazırlıqlarını davam etdirir. Heyətdəki boşluqları doldurmaq üçün bir neçə futbolçu baxışdadır. Hazırda Murad Ağakişiyev, Elhad Əhmədov, Hüseyn İsgəndərov, Viktor Qonta, İvan Dragoviç, Antonio Rukovin, Bayram Kərimov məşqçilər korpusu tərəfindən dəyərləndirilir. Ancaq onlar haqqında hələ yekun qərar verilməyib. Lazım bilinən futbolçularla yaxın günlərdə müqavilə bağlanacaq. Komandanın çox gec yığılmasına, futbolçu tapmaqda çətinliklərlə qarşılaşmağımıza baxmayaraq, inanıram ki, yeni mövsümdə fərqli “Turan” görəcəyik. Ən azı hər şey ötən mövsümdəkindən yaxşı olmalıdır".
