27 iyul 2012 12:45
Bakının qənimi Bolqarıstanı da şoka saldı
Ötən gün Avropa Liqasının ikinci təsnifat mərhələsinin cavab oyunları keçirildi. Azerisport.az xəbər verir ki, bu turnirdə Azərbaycan təmsilçilərindən “Bakı”nı elə ilk cəhdində mübarizədən kənarlaşdırmış (0:0, 0:2) Sloveniyanın “Mura” klubunun da aqibəti müəyyənləşib.
Məlum olduğu kimi, “zolaqlılar”ın qənimi ikinci təsnifat mərhələsində Bolqarıstanın CSKA klubu ilə mübarizə aparırdı. Tərəflərin Sloveniyada keçirilən ilk görüşündə hesab açılmamışdı.
Ötən gün Sofiyada baş tutan revanş görüşündə isə “Mura” daha bir sürprizə imza atıb. Belə ki, sloveniyalılar güclü rəqiblə görüşdə 1:1 hesablı heç-heçəyə imza ataraq, üçüncü təsnifat mərhələsinə vəsiqə qazanıblar.
Növbəti mərhələdə “Mura”nın qurbanı Kiyev “Arsenal”ı ola bilər. Düzdü, Ukrayna təmsilçisi bu klubla müqayisədə çox güclüdü. Amma müdafiə və əks-hücum futbolunu çox yaxşı şəkildə nümayiş etdirən Sloveniya təmsilçisindən yenə də sürpriz gözləməyə dəyər.
