29 iyul 2012 01:18
Şevçenkodan şok qərar
AÇ-2012-dən sonra futbol üzrə Ukrayna yığmasından ayrıldığını bəyan edən ulduz futbolçu Andrey Şevçenko daha bir gözlənilməz qərar verib. Azerisport.az xəbər veror ki, o, ümumiyyətlə futbolçu karyerasını da başa vurub.
Son olaraq şərəfini qoruduğu Kiyev “Dinamo”sunun rəsmi saytına qərarını şərh edən hücumçu bunları dilə gətirib: “Bu qərarım bir çoxlarını şoka sala bilər. Amma artıq gələcəyimdə futbolu görmürəm”.
Qeyd edək ki, Ukrayna futbolunun canlı əfsanəsi Andrey Şevçenko futboldan ayrılmasının səbəbini də açıqlayıb. O, bundan sonra siyasətlə məşğul olmaq istədiyini bildirib. Şevçenki bundan sonra Nataliya Korolevskayanın rəhbərlik etdiyi “Ukrayna – İrəli” partiyasına qoşulduğunu elan edib. Ulduz futbolçu bildirib ki, siyası həyatında o, sosial və idman sahələrinə dəstəyini əsirgəməyəcək.
Andrey Şevçenko futbolçu karyerasına Kiyev “Dinamo”sunda başlayıb. O, 1999-cu ildə İtaliyanın “Milan” komandasına keçib. Bundan 7 mövsüm sonra isə Şevçenko İngiltərənin “Chelsea” klubuna yollanıb. 2008-ci ildə “Milan”a qayıdan ulduz futbolçu 2009-cu ilin avqustunda “Dinamo”ya dönüb. “Şeva” “Milan”ın heyətində Çempionlar Liqası və UEFA Superkubokunun qalibi olub. O, eyni zamanda İtaliya və Ukrayna çempionu titulunu qazanıb. Şevçenko bir neçə dəfə Çempionlar Liqasının ən yaxşı bombardiri və ən yaxşı hücumçusu, eləcə də İtaliya və Ukrayna çempionatlarının ən yaxşı bombardiri sayılıb. Ukraynalı forvard 2005-ci ildə internet vasitəsilə səsvermə nəticəsində dünyanın ən yaxşı futbolçusu seçilib. Ukrayna milli komandasının heyətində 112 oyun keçirən Şeva 48 qol vurub. Milli ilə birgə dünya çempionatı 2006-da 1/4 finaladək irəliləyib.
