29 iyul 2012 14:28
“Biz azərbaycanlılardan qorxmurduq”
Yunanıstanın “Asteras” klubunun futbolçusu Dmitris Kurbelis UEFA Avropa Liqasının ikinci təsnifat mərhələsi çərçivəsində Bakı “İnter”inə qarşı keçirdikləri cavab matçı barədə fikirlərini açıqlayıb. Azerisport.az xəbər verir ki, o, Tripolisdə baş tutan həlledici qarşılaşmada qazandıqları uğurla bağlı (1:1, penaltilərlə 4:2) bunları dilə gətirib:
“İnter”ə qarşı oyunumuz heç də asan olmadı. Rəqibin də bizim qədər növbəti mərhələyə adlamaq şansı var idi. Xüsusilə də Bakıdakı oyuna olduğu kimi, matçın əsas vaxtı 1:1 hesabıyla bitəndən sonra. Amma xoşbəxtlikdən penalti zərbələrini biz daha dəqiq yerinə yetirdik”.
Yarımmüdafiəçinin sözlərinə görə, onlar cavab matçında rəqibdən qətiyyən çəkinməyiblər: “Mən deməzdim ki, biz azərbaycanlılardan qorxurduq. Mən hətta penalti zərbələri başlayanda da qorxmadım. İnanırdım ki, komanda yoldaşlarım hər şeyi necə lazımdı, elə də edəcək”.
“İnter”dən danışarkən Kurbelis öz komandasının daha güclü olduğunu söyləyib: “Biz bu komandaya qarşı hələ Bakıdakı ilk oyunun startından etibarən qorxmadan mübarizə apardıq. Hər iki oyunda qol vurmaq üçün çoxsaylı şanslarımız var idi. Cütün taleyini elə əsas vaxtda da həll edə bilərdik. Sadəcə bəxt amili müəyyən anlarda bizə mane olurdu”.
Futbolçu “İnter”lə növbəti rəqiblərini – Portuqaliya “Maritimo”sunu müqayisə də edib: “Gözəl bilirik ki, “Maritimo” daha təhlükəli rəqibdi. Buna görə də onlarla oyunlara daha ciddi hazırlaşmalıyıq. Bu komandaya da sürpriz etməyə hazırlaşırıq”.
