29 iyul 2012 11:34
“Neftçi ilə oyunlarda çox diqqətli olmalıyıq”
İsrailin “Hapoel” klubunun (Kiryat Şmona) baş məşqçisi Gili Landau UEFA Çempionlar Liqasının üçüncü təsnifat mərhələsi çərçivəsində Azərbaycan çempionu “Neftçi”yə qarşı keçirəcəkləri ilk matç öncəsi fikirlərini açıqlayıb. Azerisport.az xəbər verir ki, o, Hayfada baş tutacaq ilk qarşılaşma öncəsi Slovakiya “Jilina”sı üzərindəki zəfərlərini xatırlayıb:
“Jilina” ilə oyunlarda futbolçularımz özlərini çox yaxşı tərəfdən göstərməyi bacardılar. Amma buna görə göyün yeddinci qatına qalxmağa ehtiyac yoxdu. Çünki etiraf etməliyik ki, bizim oyunumuzda çatışmazlıqlar da var. Bunları mümkün qədər tez bir zamanda aradan qaldırmaq lazımdı”,
Xatırladaq ki, “Hapeol” bu rəqibiniə ilk oyunda 0:1 hesabıyla məğlub olmuşdu. Amma Hayfada keçirilən cavab matçında məhz İsrail çempionu qalib gələn tərəf oldu.
“Biz “Jilina” ilə oyunda böyük bir iş görsək də, bunu unutmaq lazımdı. Artıq “Neftçi” ilə oyunları düşünməliyik. Azərbaycan çempionu ilə oyunlarda çox diqqətli olmalıyıq. Rəqibimizi yaxşı öyrənməyə çalışırıq”.
Yeri gəlmişkən qeyd edək ki, “Hapoel” rəhbərliyi futbolçularına “Neftçi” səddini keçəcəkləri halda yaxşı mükafat da vəd edib.
Bu komandaların birinci oyunu avqustun 1-də İsrailin Hayfa şəhərindəki “Kiryat-Eliazer” stadionunda baş tutacaq. Matç yerli vaxtla saat 19:30-da (Bakı vaxtı ilə saat 21:30-da) başlayacaq. Cavab qarşılaşması isə avqustun 8-də Bakıda, “Dalğa Arena”da keçiriləcək. Həmin görüş saat 21:00-da start götürəcək.
