30 iyul 2012 12:55
Hapoel Neftçi ilə oyunlar öncəsi heyətini gücləndirir (FOTO)
İsrail çempionu “Hapoel” (Kiryat Şmona) UEFA Çempionlar Liqasının üçüncü təsnifat mərhələsi çərçivəsində Azərbaycana qarşı keçirəcəyi oyunlar öncəsi heyətini gücləndirməyə qərar verib. Azerisport.az xəbər verir ki, İsrail klubu Macarıstanın “Videoton” komandasında çıxış edən Laslo Lençşeni heyətinə qatmağa hazırlaşır.
“Hapoel” bu oyunçunu icarəyə götürmək fikrindədi. Bütün problemlər yoluna qoyulan kimi, onun adı “Neftçi” ilə oyunlar üçün UEFA-ya göndərilən iştirak ərizəsinə də salınacaq.
Maraq üçün bildirək ki, bu futbolçu 1988-ci ildə anadan olub. “Videoton”da 2010-cu ildən etibarən 30 oyun keçirib, 6 qol vuran hücumçu 2011-ci ildə icarə əsasında “Videoton II” (5 oyun, 4 qol), 2011-2012 mövsümündə “Kecskemeti” (21 oyun, 15 qol) klublarında forma geyinib. O, Macarıstanın aşağı yaş qruplarından ibarət yığmalarında da oynayıb.
Lençşenin gəlişi ilə "Hapoel"dəki legioner futbolçuların sayı da çoxalmış olacaq. Son mövsümdə cəmi üç legionerlər oynayan komanda öncə David Solari ilə anlaşmışdı. Bu iki oyunçu ilə yanaşı "Hapoel"də amerikalı Brayan Gerziçiç, makedoniyalı Darko Tasevski, həmçinin serbiyalı Duşan Matoviç də çıxış edir. İsrail çempionunun qalan bütün oyunçuları isə yerli futbolçulardı.
Qeyd edək ki, “Neftçi” ilə “Hapoel”in birinci oyunu avqustun 1-də İsrailin Hayfa şəhərindəki “Kiryat-Eliazer” stadionunda baş tutacaq. Matç yerli vaxtla saat 19:30-da (Bakı vaxtı ilə saat 21:30-da) başlayacaq. Cavab qarşılaşması isə avqustun 8-də Bakıda, “Dalğa Arena”da keçiriləcək. Həmin görüş saat 21:00-da start götürəcək.
