31 iyul 2012 13:04
500 min avroluq yunan forvardın hansı klubuma keçdiyi dəqiqləşdi
Futbol üzrə Yunanıstan yığmasının hücumçusu Vangelis Mantsiosun Azərbaycanın aparıcı klublarının birindən təklif aldığını xəbər vermişdik. Azerisport.az xəbər verir ki, artıq onun Premyer Liqamızın hansı klubuna keçəcəyi dəqiqləşib.
Belə ki, Yunanıstan mətbuatının yazdığına görə, Vangelisi “Bakı” transfer edir. Artıq tərəflər müqavilə ilə bağlı bütün detalları müzakirə ediblər və razılığa gəliblər. Qeyd edək ki, 29 yaşlı futbolçunun məhz “Bakı”ya keçəcəyi öncədən də proqnozlaşdırılırdı. Çünki bu komanda yaxşı hücumçu axtarışında idi. Komandanın yeni baş məşqçisi Bojidar Bandoviç isə vaxtilə Yunanıstanda çalışdığından, bu ölkənin futbolçularını yaxşı tanıyırdı. Elə Mantsiosun paytaxt klubuna keçidi də məhz serb mütəxəssisin sayəsində gerçəkləşib. Amma hələlik “Bakı” bu transferlə bağlı rəsmi açıqlama yaymağa tələsmir.
Qeyd edək ki, hücumçu ilinə 150 000 avro qazanacaq. Vangelis həmçinin ölkəmizdə qazanacağı uğurların müqabilində də mükafatlar qazanmaq şansına malik olacaq. Belə ki, Azərbaycan kubokunu qazanacağı halda 50 min, Çempionlar Liqasının qrup mərhələsinə çıxacağı halda 80 min, Avropa Liqasının qrup mərhələsinə çıxacağı halda 50 min avro mükafat almaq şansı qazanacaq. Bundan əlavə o, mövsüm ərzindəki oyunların 60 faizində iştirak etsə, əlavə 30 000, 80 faizində iştirak etsə, 40 000 avro qazanc əldə edəcək. Mövsüm ərzində 12 qol vuracağı halda 20 000, 17 qoldan artığına imza atacağı halda 30 000 əlavə mükafat nəzərdə tutulub. Bütövlükdə isə, onun Azərbaycanda 500 min avro qazanmaq şansı var.
1983-cü ildə anadan olan Vangelis peşəkar karyerasında 2001-ci idlə “Panionios”da başlayıb. O, 2005-ci ilə qədər bu komandada 70 oyunda 15 qol vurub. 2005-2011-ci illər aralığında isə o, “Panathinaikos”un şərəfini qoruyub. Premyer Liqamızın potensial oyunçusu bu komandada 68 oyuna 19 qol vurub. Lakin həmin illərdə o, bəzi klublara icarəyə də verilib. Məsələn, 2008-ci ildə Almaniyanın “Eintracht” klubuna icarəyə verilən futbolçu burda 10 oyun keçirib, 1 qol vurub. 2010-cu ildə “Anorthosis” onu sıralarına qatıb (14 oyun, 9 qol). Həmin il həmçinin Portuqaliyanın “Maritimo” komandası da onu icarəyə götürüb. Amma o, burda cəmi 1 oyuna çıxıb. 2011-2012 mövsümündən etibarən isə o, OFI-yə məxsusdu. Futbolçu bu komandada 22 oyun keçirib, 7 qol vurub.
Vangelis 2005-ci ildən etibarən Yunanıstan yığmasına da çağırılır. O, bu komandada indiyə qədər 7 oyun keçirib.
