31 iyul 2012 21:55
“Biz Neftçi ilə oyunda göstərmək istəyirik ki, futbolda pul hər şeyi həll etmir”
İsrail çempionu “Hapoel”in (Kiryat Şmona) baş məşqçisi Gil Landu UEFA Çempionlar Liqasının üçüncü təsnifat mərhələsi çərçivəsində “Neftçi”yə qarşı keçirəcəkləri ilk matçla bağlı fikirlərini açıqlayıb. Azerisport.az xəbər verir ki, o, Hayfada baş tutacaq qarşılaşmadan öncə bunları dilə gətirib:
“Bizi iki çətin qarşılaşma gözləyir. Futbolçularıma meydanda sona kimi mübarizə aparmaq lazımdı. Aqressiv oyun sərgiləməliyik. Bizim əsas üstünlüyümüz komanda oyunudu. Düzdü, bizim elə də böyük maliyyə imkanlarımız yoxdu. Böyük komandalarla mübarizə apara bilmərik. Amma pul hər şeyi həll etmir və bunu meydanda göstərmək istəyirik”.
İsrailli mütəxəssis “Neftçi” barədə də danışıb: “Azərbaycan çempionu ÇL ərəfəsində dörd futbolçu ilə güclənib. Bu komanda ev oyunlarına üstünlük verir. Çünki evdə daha yaxşı oynayırlar. Amma onlar güman ki, ilk oyunda da uğurlu nəticə qazanmağa çalışacaqlar. Buna baxmayaraq, bizim hədəfimiz 90 dəqiqə oyuna nəzarəti əldə saxlamaqdı. Bizim yaxşı azarkeş ordumuz olacaq. Hansı ki, onlar bizdən uğur gözləyirlər. Bu barədə futbolçularıma da demişəm. Komanda hələ öz pik nöqtəsində deyil. Amma getdikcə daha da artıracağımıza əminəm”.
Qeyd edək ki, bu komandaların birinci oyunu sabah Hayfa şəhərindəki “Kiryat-Eliazer” stadionunda baş tutacaq. Matç yerli vaxtla saat 19:30-da (Bakı vaxtı ilə saat 21:30-da) başlayacaq. Cavab qarşılaşması isə avqustun 8-də Bakıda, “Dalğa Arena”da keçiriləcək. Həmin görüş saat 21:00-da start götürəcək.
