1 avqust 2012 12:46
Tərlan Əhmədov: Neftçinin əsas hədəfi səfər qoluna imza atmaqdı
“Neftçi”nin məşqçisi Tərlan Əhmədov UEFA Çempionlar Liqasının üçüncü təsnifat mərhələsi çərçivəsində İsrail çempionu “Hapoel”ə (Kiryat Şmona) qarşı keçirəcəkləri ilk matçla bağlı fikirlərini açıqlayıb. Azerisport.az xəbər verir ki, o, Hayfada baş tutacaq qarşılaşma ilə bağlı öncə bunları dilə gətirib:
“Biz “Hapoel”in Slovakiya “Jilina”sı ilə oyunlarının videoyazısına baxmışıq. Bilirik ki, kifayət qədər yaxşı komandadı. Qol vurmağı bacarırlar. İsrail futbolu mənə tanışdı. Bizim qarşıdakı görüşdə əsas hədəfimiz səfər qoluna imza atmaqdı. Çünki bu, bizə növbəti mərhələyə çıxmaq yolunda kömək edəcək”.
“Ağ-qaralar”ın məşqçisinin sözlərinə görə, ilk oyunun nəticəsi vacib əhəmiyyət daşıyır: “Rəqibimiz güclü komandadı. Amma bizim də şansımız var. Hazırda “Neftçi”də əla atmosfer hökm sürür. Bu oyuna yaxşı formada hazırlaşmışıq. Komandanın “Hapoel”lə oyun üçün motivasiyası da yaxşıdı. Xüsusilə də qrup mərhələsinin bir addımlığında olmağımız komandanı ruhlandırır”.
Mövsümlərarası dövrdə “Neftçi” dörd yeni futbolçu alsa da, Əhmədov komandanın yaxşı futbol sərgilədiyini bildirib: “Bəzi futbolçularımız “Neftçi”yə yeni gəliblər. Amma ümid edirəm ki, onlar qarşıdakı oyunlarda da özlərini yaxşı tərəfdən göstərməyi bacaracaqlar. Futbolçularımız “Hapoel”lə oyunda nəyi necə edəcəklərini yaxşı bilirlər”.
Gənc məşqçi rəqib komandanın heyətində çəkindikləri futbolçuların adlarını da açıqlayıb: “Şimon Abihazira, Darko Tasevski və David Solari təhlükəli futbolçulardı. Bu oyunçular hücumdakı fəal oyunları ilə yanaşı müdafiəyə də kömək edirlər. Onları diqqətdə saxlamalıyıq”.
Qeyd edək ki, bu komandaların birinci oyunu bu gün Hayfa şəhərindəki “Kiryat-Eliazer” stadionunda baş tutacaq. Matç yerli vaxtla saat 19:30-da (Bakı vaxtı ilə saat 21:30-da) başlayacaq. Cavab qarşılaşması isə avqustun 8-də Bakıda, “Dalğa Arena”da keçiriləcək. Həmin görüş saat 21:00-da start götürəcək.
