2 avqust 2012 12:34
İnterdən ayrılan futbolçu Vüqar Əsgərova komanda yoldaşı oldu, ilk oyundaca qol vurdu
Bu yay “İnter”in yollarını ayırdığı hücumçu Girt Karlson özünə yeni komanda tapıb. Azerisport.az xəbər verir ki, o, bundan sonra yığmamızın hücumçusu Vüqar Əsgərovun da çıxış etdiyi Latviyanın “Metallurg” klubunun şərəfini qoruyacaq.
Artıq Karlson yeni komandasında debüt etməyə də imkan tapıb. Belə ki, ötən gün Latviya çempionatında 10-cu turdan təxirə salınan “Metallurg” – “Jelqava” görüşü keçirilib. Görüşün ilk yarısında hesab açılmayıb. Fasilədən sonra isə baş məşqçi yeni transfer Karlsonu meydana buraxıb. Hesabı da 64-cü dəqiqədə məhz bu futbolçu açıb. Qoldan dərhal sonra o, sarı vərəqə ilə də cəzalanıb.
Yığmamızın hücumçusu da meydana çıxıb. Ötən oyunda olduğu kimi, o, yenə görüşün axırlarında – 68-ci dəqiqədə döyüşə atılıb. Lakin meydanda olduğu dəqiqələrdə heç nə ilə yadda qalmayıb.
Görüşə gəlincə, matçın son saniyələrində - 90+3-cü dəqiqədə qol vuran “Jelqava” çətin səfərdən 1 xalla qayıtmağı bacarıb.
“Metallurg” hazırda 32 xalla 10 komanda arasında dördüncü yerdə gedir və ehtiyatda daha iki oyunu var.
