3 avqust 2012 13:16
İnterlə Qarabağın 28-ci dueli
Futbol üzrə Azərbaycan Premyer Liqasının 1-ci turunun “İnter” - "Qarabağ" görüşü hər iki komanda üçün sayca 28-ci olacaq. Azerisport.az xəbər verir ki, bunadək komandalar bir-biri ilə 27 dəfə qarşılaşıblar.
22 oyun çempionat çərçivəsində keçirilib. 5 oyun isə kubok turnirinin payına düşür. “İnter” rəqibini 10 dəfə məğlub edə bilib, “Qarabağ” da 10 qələbəylə fərqlənib, qalan 7 matçda tərəflər meydandan sülhlə ayrılıblar. Vurulan topların fərqi bərabərdir - 21:21.
Komandalar ilk dəfə 2004-cü ilin noyabr ayında çempionat çərçivəsində üz-üzə gəliblər. Həmin görüş 3:1 hesabıyla ağdamlıların xeyrinə başa çatıb. “İnter” və “Qarabağ” qarşıdurmasında ilk qolun müəllifi rəqibin forvardı Vadim Vasilyev olub və o, bu qolu penalti zərbəsindən vurub.
Xatırlardaq ki, ötən mövsümdə komandalar dörd dəfə qarşılaşıblar, ilk oyunda ağdamlılar 1:0 hesabıyla qalib gəliblər. İkinci qarşılaşma qolsuz bərabərliklə başa çatıb, üçüncü oyunda da tərəflər meydandan sülhlə ayrılıblar - 1:1, dördüncü oyunda isə sevinən tərəf yenə "Qarabağ" olub - 1:0.
“İnter” - “Qarabağ” oyunlarında ən populyar hesab 1:0-dı. Belə nəticə 27 oyundan 15-də qeydə alınıb. Maraqlıdı ki, qarşılaşmaların tarixində darmadağın hesab qeydə alınmayıb, yalnız iki dəfə komandalara bir-birini 2 top fərqilə qalib gəlmək müyəssər olub.
Azərbaycan çempionatında "Qarabağ"a qarşı keçirilən ev oyunlarında “İnter” üstünlüyə malikdi. Belə ki, 11 qarşılaşmada “İnter” 6 dəfə rəqibini məğlub etməyi bacarıb. 3 oyun heç-heçə başa çatıb və 2 dəfə ağdamlılar qələbə qazanıb. Bu qarşılaşmalarda top fərqi “İnter”in xeyrinə 10:6.
Qeyd edək ki, "İnter" - "Qarabağ” matçı avqustun 5-də keçiriləcək. Oyun saat 20.00-da başlayacaq.
“İnter” - "Qarabağ”
27,+10,=7-10, top fərqi - 21:21.
