3 avqust 2012 13:54
Yunanıstan yığmasının qapıçısı Neftçiyə keçir
Futbol üzrə Yunanıstan yığmasının, eləcə də bu ölkənin “Aris” klubunun qapıçısı Mixalis Sifakis karyerasını Azərbaycan çempionu “Neftçi”də davam etdirə bilər. Azerisport.az xəbər verir ki, 28 yaşlı qapıçı paytaxt klubundan sərfəli təklif alıb.
Bu barədə Yunanıstan mətbuatı məlumat yayıb. Məlumatda bildirilir ki, bakılılar Sifakisə ilə 280 min avro ödəməyə hazırdılar..
Lakin Sifakislə başqa ölkə klubları da maraqlanır. Məsələn, onun xidmətində Fransa və Almaniya klubları da maraqlıdılar. Bundan əlavə yerli PAOK da onu heyətinə qatmaq üçün ciddi canfəşanlıq nümayiş etdirir. Həmin təkliflər arasında ən diqqətçəkəni isə məhz “Neftçi” variantıdı. Məsələn, PAOK onun ilinə 250 min avro verir. Fransa və Almaniya klublarının təklifləri isə ümumiyyətlə cəlbedici deyil. Ölkəsində qalmağı düşünən Sifakisin daha çox PAOK variantına isti baxdığı, yalnız bu klubla anlaşa bilməyəcəyi halda, digər variantları gözdən keçirəcəyi bildirilir.
Məlum olduğu kimi, “Neftçi”nin yunanıstanlı qapıçıya maraq göstərməsi səbəbsiz deyil. Çünki paytaxt klubu ötən gün Rauf Mehdiyevi transferə çıxarıb və hazırda yeni qapıçı axtarışındadı. Onun əvəzində futbol üzrə Azərbaycan yığmasının qapıçısı, “Xəzər Lənkəran”ın transferə çıxardığı Kamran Ağayevin də paytaxt klubuna keçidi gündəmdədi. Lakin “ağ-yaşıllar” Ağayevi pulsuz buraxmaq fikrində deyil. Belədə, cənub klubuna pul ödəməli olan “Neftçi” üçün azad agent olan Sifakisi transfer etmək daha sərfəlidi.
Maraq üçün bildirək ki, 1984-cü ildə anadan olan Sifakisin ilk peşəkar klubu 2002-2008-ci illərdə şərəfini qoruduğu OFI olub. O, bu komandada 101 oyun keçirib. 2007-2008-ci il mövsümündə onu “Olympiacos” icarəyə götürsə də, burda cəmi 2 oyunda çıxış edib. 2008-2012-ci illər aralığında isə “Aris”in şərəfini qoruyub və 80 matça çıxıb.
Sifakis Yunanıstanın gənclərdən ibarət yığmasında 15 oyun keçirib. 2005-ci ildən isə ölkənin əsas millisinə dəvət alır və bu komandada da 15 görüşə çıxıb. O, Yunanıstan millisinin AÇ-2012-dəki dörd oyunundan üçündə əsas heyətdə meydana çıxmışdı.
