5 avqust 2012 11:46
“Ümid edirəm ki, mövsümə qələbə ilə başlaya biləcəyik”
“İnter”in yarımmüdafiəçisi Petar Zlatinov Premyer Liqanın birinci turunun “Qarabağ”la oyunu öncəsi fikirlərini açıqlayıb. Azerisport.az saytına müsahibəsində o, yeni mövsüm ərəfəsində bunları dilə gətirib:
“Çox ümid edirəm ki, ilk oyunda yaxşı oynaya və çempionata qələbə ilə başlaya biləcəyik. Öz məqsədimizə çatmaq üçün sona kimi mübarizə aparacağıq. Xüsusilə də avrokuboklardan tez ayrıldığımız üçün qələbə qazanmağı çox istəyirik. Bu, bizə çox fayda verər”.
Ötən mövsüm “bankirlər” “Qarabağ”ı heç bir oyunda məğlub edə bilməmişdi. Amma bolqar yarımmüdafiəçi qarşıdakı oyuna optimist yanaşır: “Ümumiyyətlə, hansısa rəqibin münasib olduğunu demək çətindi. Hər bir komanda meydana qələbə qazanmaq üçün çıxır. Biz də bu oyunda qələbə qazanmaq üçün əlimizdən gələni edəcəyik. “Qarabağ”la ötən mövsümdəki oyunlarda imza atdığımız uğursuzluqları unutdurmaq üçün başqa çıxış yolumuz yoxdu”.
Lakin Zlatinov özü mövsümün start matçında forma geyə bilməyəcək: “Təəssüf ki, belədi. Mənim kiçik zədəm var. Ona görə də bu həftəni buraxmağa məcburam. Ümid edirəm ki, 2-ci turdan komandama kömək edə biləcəm”.
“İnter”in yarımmüdafiəçisi komandasının bu mövsüm üçün hədəflərindən də danışıb: “Hədəf həmişəki kimidi – Azərbaycan kubokunu qazanmalı, çempion olmalıyıq. Ümumiyyətlə, ölkə kuboku son illər son anda əlimizdən çıxır. Odu ki, bu dəfə həmin uğursuzluqları da unutdurmağı hədəfləmişik”.
