6 avqust 2012 13:57
Gənclər kubokuna yekun vuruldu
Azərbaycan Respublikası Gənclər və İdman Nazirliyi, Azərbaycan Futbol Federasiya Assosiyasiyaları (AFFA), ADİDAS və “İRƏLİ” İdman Mərkəzinin birgə təşkilatçılığı ilə keçirilən Azərbaycanda gənclərarası ilk “Gənclər Kuboku” layihəsinə yekun vurulub. Azerisport.az xəbər verir ki, layihənin bağlanış mərasimi 6 avqust 2012-ci il tarixində saat 18:30-da AFFA-nın inzibati binasında konfrans zalında keçiriləcək.
Bağlanış mərasimində AFFA-nın baş katibi Elxan Məmmədov, “İRƏLİ” İctimai Birliyinin sədri Rauf Mərdiyev, millət vəkili Ceyhun Osmanlı, “NOVCO” Şirkətlər Qrupunun prezidenti Fərid Novruzi iştirak edəcəklər.
Xatırladaq ki, turnir çərçivəsində iki play-off mərhələsi keçirilib. Birinci play-off mərhələsində 32 komanda, ikinci play-off mərhələsində isə birinci mərhələdə qalib gələn 16 komanda iştirak edib. İkinci play-off mərhələsindən sonra qalib gələn 8 komanda qrup mərhələsində mübarizəni davam etdirib.
Turnir çərçivəsində 19 iyul tarixində final mərhələsində ATGTİ (Azərbaycan Tələbə Gənclər Təşkilatları İttifaqı İctimai Birliyi) və ASAİF (Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu) komandaları qarşılaşıb və ASAİF komandası qalib gəlib. Layihə çərçivəsində bütün oyunlar AFFA-nın Futbol Akademiyasının meydançasında keçirilib.
Qeyd edək ki, layihənin keçirilməsində əsas məqsəd 2012-ci ilin Cənab Prezident tərəfindən “İdman ili” elan edilməsini, ölkəmizdə bu sahənin inkişafına dövlət qayğısının artırılmasını nəzərə alaraq gənclər arasında idmanın inkişafı, sağlam həyat tərzinin təbliği və bu sahəyə marağı olan gəncləri bir araya gətirməkdir.
