7 avqust 2012 13:08
AFFA-dan İnter, Simurq və Rəvana sərt cəza
Bu gün AFFA İntizam Komitəsinin yeni mövsümlə bağlı ilk iclası keçirilib. Azerisport.az xəbər verir ki, aparılan müzakirələrdən sonra Premyer Liqanın ilk turu ilə bağlı aşağıdakı qərarlar verilib.
Azərbaycan Premyer Liqasının 1-ci turunun “Simurq” – “Qəbələ” matçının 84-cü dəqiqəsində “Qəbələ”nin futbolçusu Urfan Abbasov kobud oyuna görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub. Oyunun 66-cı dəqiqəsində meydançaya “Simurq”un azarkeşləri tərəfindən kənar əşya atıldığı üçün klub 2000 manat cərimə olunub. Təcili tibbi yardım briqadası gecikdiyinə görə matç 10 dəqiqə gec başladığı üçün meydan sahibi klub 2000 manat cərimə olunub.
“İnter” – “Qarabağ” matçında “İnter”in futbolçuları meydançaya vaxtında çıxdmadığına görə matç 6 dəqiqə gec başladığı üçün “İnter” 3000 manat cərimə olunub.
“Rəvan” – “Xəzər Lənkəran” matçında təcili tibbi yardım briqadasının 5, yanğınsöndürmə briqadasının isə 10 dəqiqə gecdiyinə görə meydan sahibi klub 2000 manat cərimə olunub.
