7 avqust 2012 20:24
UEFA Bakının qənimini texniki məğlubiyyətlə sevindirdi
“Bakı”nı Avropa Liqasının birinci təsnifat mərhələsində mübarizədən kənarlaşdıran Sloveniyanın “Mura” klubu daha bir şad xəbər alıb. Azerisport.az xəbər verir ki, UEFA Kiyev “Arsenal”ı ilə oyuna görə sloveniyalılara 3:0 hesablı qələbə verib.
Buna səbəb “Arsenal”ın oyunçusu Erik Matuku olub. O, Belçikanın “Genk” klubunda çıxış edərkən cəzalı duruma düşsə də, cəzasını tam başa vurmadan “Mura”ya qarşı oyunda forma geyinib. Bu səbəbdən Kiyev təmsilçisinin 3:0 hesablı qələbəsi əlindən alınıb və “Mura”ya 3:0 hesablı qələbə verilib.
Qeyd edək ki, “Mura” Avropa Liqasının 1-ci təsnifat mərhələsində “Bakı”nı, 2-ci təsnifat mərhələsində isə Sofiya CSKA-sını mübarizədən kənarlaşdırmışdı.
Maraq üçün xatırladaq ki, “Bakı” özü də oxşar hadisə ilə üzləşib. Belə ki, 2010-2011 mövsümündə Avroliqanın 2-ci təsnifat mərhələsində evdə Çernoqoriyanın “Buducnost” klubuna 2:1 hesabı ilə qalib gələn paytaxt təmsilçisi cəzalı oyunçu oynatdığına görə 0:3 hesablı texniki məğlubiyyət almışdı. Səfər oyununda isə bunun əvəzini çıxmaq mümkün olmamışdı. İndi “Arsenal”ın belə zərbədən sonra necə özünə gələcəyi və “Mura” möcüzəsinə son qoyub-qoymayacağı maraqla gözlənilir.
