8 avqust 2012 13:01
Hapoelin futbolçuları Bakıda oteldən kənara buraxılmır
UEFA Çempionlar Liqasının üçüncü təsnifat mərhələsinin cavab oyununda “Neftçi”nin qonağı olacaq İsrailin “Hapoel” (Kiryat Şmona) klubunun futbolçuları oteldən kənara buraxılmır. Azerisport.az xəbər verir ki, “Hilton” otelində məskunlaşan komandanın üzvləri Bakıda xüsusi mühafizə altında saxlanılır.
İsrail mediasının məlumatına görə, komandanın futbolçularına oteli icazəsiz tərk etmək qadağan olunub. Onlar ötən gün baş tutan son məşqə də xüsusi mühafizə altında yollanıblar. Yerli media bunu İranın mümkün təxribatlarından qorunmaq üçün edildiyini iddia edir.
İsraillə İran uzun illərdi düşmən münasibətdədi. Bu ölkələr arasında diplomatik və ticarət əlaqələri yoxdu. İran həmçinin Azərbaycanı tez-tez İsraillə əməkdaşlıqda ittiham edir.
Məhz bu səbəbdən ötən gün “Dalğa Arena”ya komanda ilə birgə İsrailin Təhlükəsizlik Xidmətinin nümayəndələri də təşrif buyurublar. Onlar hətta xüsusi öyrədilmiş itlərlə sözügedən arenanın hər tərəfini yoxlayıblar. İsraillilər hətta “Neftçi”nin paltardəyişmə otağına qədər bu yoxlamaları aparıblar. Bu isə Azərbaycan klubunun rəhbərliyinin kəskin narazılığına səbəb olub. Bununla bağlı qarşı tərəfə də narazılıq çatdırılıb.
Maraq üçün xatırladaq ki, bu klublar arasında İsraildə keçirilən ilk oyunda meydan sahibləri 4:0 hesabıyla qalib gəlmişdilər. Cavab görüşü isə bu gün "Dalğa Arena"da keçiriləcək və saat 21:00-da başlayacaq.
