8 avqust 2012 15:56
“Neftçinin buna nail olması mümkünsüzdü”
İsrail çempionu “Hapoel”in (Kiryat Şmona) yarımmüdafiəçisi Ravid Qazal UEFA Çempionlar Liqasının üçüncü təsnifat mərhələsi çərçivəsində “Neftçi”yə qarşı keçirəcəkləri cavab matçı ilə bağlı fikirlərini açıqlayıb. Azerisport.az xəbər verir ki, o, Bakıda baş tutacaq qarşılaşma öncəsi bunları dilə gətirib:
“İlk oyunda qazandığımız böyük hesablı qələbəyə baxmayaraq, arxayınlaşmağa əsas yoxdu. Öz oyunumuzu sərgiləməyimiz lazımdı. Əgər bir qol vursaq, onda hər şey daha yaxşı olacaq. O zaman rəqib bizi 6:1 hesabıyla məğlub etmək məcburiyyətində qalacaq. Bunu isə mümkünsüz hesab edirəm. Biz özümüzə əminik. Lakin hər ehtimala qarşı onu da nəzərə almaq lazımdı ki, hələ mərhələni keçməmişik”.
Qeyd edək ki, bu komandalar arasında avqustun 1-də Hayfa şəhərində keçirilən ilk oyunda “Hapoel” 4:0 hesabıyla qalib gəlmişdi. Cavab qarşılaşması isə bu gün Bakıda, “Dalğa Arena”da keçiriləcək və saat 21:00-da start götürəcək.
