8 avqust 2012 12:26
Premyer Liqa klubları Bakı stadionlarından çıxarılır
Bu il Bakıda təşkil olunacaq FIFA U-17 qadınlararası dünya çempionatı ilə əlaqədar Azərbaycan Premyer Liqasının oyunları paytaxtda keçirilməyəcək. Azerisport.az xəbər verir ki, bu müddətə təsadüf edən üç turun Bakıda keçirilməli olan oyunları bölgələrdə təşkil olunacaq.
Matçlar əsasən Qəbələ, Zaqatala, Yevlax və digər şəhərlərdə keçiriləcək. PFL-dən bildirilib ki, bununla bağlı artıq klublara bildiriş göndərilib.
U-17 qadınlararası dünya çempionatı Lənkəran şəhər mərkəzi stadionunda da keçiriləcəyindən, "Xəzər Lənkəran" da göstərilən müddətdə ev oyunlarına başqa stadionda çıxacaq. "Xəzər-Lənkəran"a görüşlərini Yevlax şəhər stadionunda keçirmək təklif edilib.
Qeyd edək ki, bu il sentyabrın 22-dən oktyabrın 13-dək Bakıda FIFA U-17 qadınlararası dünya çempionatı təşkil olunacaq. Komandalar dörd qrupda mübarizə aparacaqlar:
A qrupu: Azərbaycan, Kolumbiya, Nigeriya, Kanada
B qrupu: Fransa, ABŞ, Şimali Koreya, Qambiya
C qrupu: Meksika, Yeni Zelandiya, Braziliya, Yaponiya
D qrupu: Uruqvay, Çin, Qana, Almaniya.
(Trend)
