9 avqust 2012 14:49
Vaqif Cavadov üzr istədi, Berti Foqts bağışladı
Bu gün AFFA-nın inzibati binasında baş katib Elxan Məmmədovun iştirakı ilə Azərbaycan milli komandasının baş məşqçisi Berti Foqts və futbolçu Vaqif Cavadov arasında görüş keçirilib. Azerisport.az xəbər verir ki, görüşdə baş məşqçi və futbolçu arasında fikir mübadiləsi aparılıb.
Görüşlə bağlı Berti Foqts və Vaqif Cavadov fikirlərini də açıqlayıb. Vaqif Cavadov açıqlamasında üzr istəyib: "Avropa çempionatının seçmə mərhələsində Avstriya millisinə qarşı keçirdiyimiz oyunda məğlub olmağımız psixoloji cəhətdən mənə mənfi təsir etmişdi və emosional vəziyyətdə artıq çoxlarına məlum olan həmin xoşagəlməz hadisə baş vermişdi. Əlbəttə ki, həmin hadisə məni çox təəssüfləndirir. Mən bu hərəkətimə görə AFFA-dan və komanda yoldaşlarımdan üzr istəyir və bir futbolçu kimi Azərbaycan futbolunun inkişafına bacardığım qədər yardımçı olmaq fikrindəyəm".
Berti Foqts isə əff etdiyi oyunçu ilə bağlı bunları dilə gətirib: "Vaqif Cavadov gənc və bacarıqlı futbolçudur. Sevindirici haldır ki, bu görüş təşkil olundu və biz bəzi məsələlərə aydınlıq gətirdik. Hesab edirəm ki, V.Cavadova ikinci dəfə şans verilməlidir".
