9 avqust 2012 17:06
Hapoel Neftçi üzərindəki zəfərə görə mükafatı 15 minə qaldırdı
İsrail çempionu “Hapoel”in (Kiryat Şmona) rəhbərliyi UEFA Çempionlar Liqasının üçüncü təsnifat mərhələsi çərçivəsində “Neftçi” üzərindəki zəfərə görə komanda üçün ayrılan mükafatın məbləğini qaldırıb. Azerisport.az xəbər verir ki, bu barədə İsrail mətbuatı məlumat yayıb.
Belə ki, klub rəhbərliyi öncə “Neftçi”ni keçəcəkləri halda hər futbolçuya 10 min avro mükafat veriləcəyini bəyan etmişdi. Amma görünür Azərbaycan çempionu ilə oyunlarda sərgilədikləri futbol klub prezidenti İzi Şeratskinin çox xoşuna gəlib. Belə ki, o, bu məbləği daha 5 min artırmaq haqda qərar qəbul edib. Beləliklə, “Neftçi”ni mübarizədən kənarlaşdırdıqlarına görə komanda üzvləri 15 min avroluq məbləğə layiq görülüblər.
Qeyd edək ki, bu komandalar arasında avqustun 1-də Hayfa şəhərində keçirilən ilk oyunda “Hapoel” 4:0 hesabıyla qalib gəlmişdi. Bakıdakı cavab qarşılaşmasında da İsrail təmsilçisi məğlub olmadı – 2:2. Bu nəticə sayəsində “Hapoel” ÇL-in pley-off mərhələsinə vəsiqə qazandı. Bu mərhələdə ududzacağı halda isə, bu komanda həm də Avropa Liqasının qrup mərhələsində çıxış etmək şansına malikdi.
