10 avqust 2012 14:03
Yığmamızın rəqibinin 6 xalı qaytarıldı
UEFA Apellyasiya Komitəsi futbol üzrə Rusiya yığmasının 2016-cı il Avropa çempionatının seçmə mərhələsində 6 xaldan şərti məhrum olunmasını nəzərdə tutan cəzanı ləğv edib. Azerisport.az xəbər verir ki, 2012-ci il Avropa çempionatında rusiyalı azarkeşlərin davranışı ilə əlaqədar kəsilmiş şərti cəza AÇ-2016-nın seçmə turnirində 3 ev oyununu azarkeşsiz keçirməklə əvəzlənib.
Lakin bu da şərtidi. Daha dəqiqi, cəza yalnız UEFA qaydalarının pozulması təkrarlandığı halda tətbiq oluna bilər. Əvəzində Rusiya Futbol İttifaqına 120 min avro cərimə cəzası qüvvədə qalıb.
Qeyd edək ki, cərimə və 6 xaldan şərti məhrumetmə cəzası iyunun 8-də Rusiya ilə Polşa yığmaları arasında Vrotslav şəhərində keçirilmiş matçdan sonra UEFA İntizam Komitəsi tərəfindən kəsilib. Səbəb Rusiya yığması azarkeşlərinin meydana yandırıcı maddə atmaları və tribunalarda təhqiramiz bannerlər nümayiş etdirmələri olub.
