10 avqust 2012 03:15
Premyer Liqa, 2-ci tur: Ağasəlim Mircavadovun proqnozu
Futbol üzrə Azərbaycan yığmasının və “Xəzər Lənkəran”ın sabiq baş məşqçisi Ağasəlim Mircavadov azerisport.az sayına müsahibəsində Premyer Liqanın ikinci turunun oyunları ilə bağlı proqnozlarını açıqlayıb.
Xəzər Lənkəran – Kəpəz
Hesab edirəm ki, “Xəzər Lənkəran”ın uğur qazanmaq şansı daha çoxdu. Nəzərə alsaq ki, oyun bu komanda üçün doğma olan arenada keçiriləcək, buna şübhə etməmək olar. Həm də iddialı bir komanda üçün evdə xal itirmək olmaz. “Kəpəz”də isə hələ oyun lazımı səviyyədə deyil. Məncə bu görüşdə “Xəzər Lənkəran” qalib gələcək.
Bakı – Simurq
Futbolçularının səviyyəsi baxımından müqayisə etsək, “Bakı” Zaqatala klubundan daha güclüdü. Amma “Simurq” da ambisiyalı komandaya çevrilib. Hər halda mən “Bakı”nın qələbə qazanacağını daha real sayıram.
Qarabağ – Neftçi
“Qarabağ” çempionata pis başlamadı. “İnter”lə oyunda bir xal qazandı. Aydın məsələdi ki, “Neftçi” bir qədər yorğun olacaq. Lakin düşünmürəm ki, bu komanda ikinci heyətlə mübarizə aparsın. Biz gərgin mübarizənin şahidi olacağıq. Ona görə də heç-heçəyə üstünlük verirəm.
Qəbələ - İnter
Qəbələdə oynamaq həmişə ağır olub. Amma bu komandaların ilk oyunlarından sonra indi hansının qalib gələcəyini proqnozlaşdırmaq çətindi. Şanslar bərabərdi. Buna görə də heç-heçə olacağı qənaətindəyəm.
AZAL – Rəvan
AZAL ötən tur Sumqayıtda xal itirdi. Amma “təyyarəçilər”in həmin səhvləri qarşıdakı görüşlərdə təkrarlamayacaqlarını düşünürəm. AZAL qələbə qazanacaq.
Turan – Sumqayıt
Fikrimcə, tovuzlular doğma meydanda “Sumqayıt”dan qol buraxmazlar. Baxmayaraq ki, sumqayıtlılar bu yay heyətə yaxşı əl gəzdiriblər. Buna baxmayaraq, “Turan” Gəncədə qazandığı qələbədən sonra bu dəfə məğlub olmaz. Bu oyunda da onların qalib gələcəyini düşünürəm.
