10 avqust 2012 16:45
Neftçi Kipr klubuna rəqib oldu (YENİLƏNİB)
Bu gün futbol üzrə UEFA Avropa Liqasında 2012-2013 mövsümünün pley-off mərhələsinin püşkatma mərasimi keçirilib. Azerisport.az xəbər verir ki, qitənin nüfuzuna görə ikinci dərəcəli klub turnirinin qrup mərhələsinə vəsiqə uğrunda bir Azərbaycan klubu da mübarizə aparacaq.
Bu, son ölkə çempionu “Neftçi”di. Təmsilçimiz avrokuboklara Çempionlar Liqasının ikinci təsnifat mərhələsindən start vermişdi. Gürcüstan “Zestafoni”sini mübarizədən kənarlaşdıran (3:0, 2:2) ardından İsrailin “Hapoel” (Kiryat Şmona) klubuna məğlub oldu (0:4, 2:2) və indi mübarizəni Avroliqada davam etdirmək məcburiyyətində qalıb.
Qeyd edək ki, bu turnirin qrup mərhələsinə vəsiqə uğrunda “Neftçi” ilə yanaşı daha 61 klub mübarizə aparacaq. Bunların 29-u üçüncü təsnifat mərhələsinin qalibləridi. Qalan iştirakçılardan 19-u mübarizəyə məhz bu mərhələdən start verəcəklər. Daha 14 klub isə UEFA Çempionlar Liqasının üçüncü təsnifat mərhələsində məğlub olaraq, mübarizəni Avroliqada davam etdirmək hüququ qazananlardı. Hansı ki, Azərbaycan çempionu “Neftçi” də məhz sonuncu qrupa aiddi.
İsveçrənin Nyon şəhərində keçirilən püşkatma öncəsi iştirakçı klublar artıq səbətlərə də bölünmüşdülər. Gözlənildiyi kimi, Azərbaycan çempionu ən zəiflərin arasında – “səpələnməmişlər” səbətində yer almışdı. Bu isə o deməkdi ki, “Neftçi” özündən qat-qat güclü komandalara rəqib olacaqdı. “Ağ-qaralar”a rəqib olması gözlənilən yekun potensial rəqiblərin siyahısı isə belə idi: Inter (İtaliya), AZ Alkmaar (Hollandiya), APOEL (Kipr), Partizan (Serbiya), Newcastle (İngiltərə).
Lakin əvvəlki püşkatmalarda olduğu kimi, püşk bu dəfə də Azərbaycan çempionunun üzünə gülüb. Belə ki, püşkatma nəticəsində "Neftçi" APOEL-ə rəqib olub. Özü də komandamız yenə ilk oyununu səfərdə keçirəcək. Bu isə həlledici oyunu Bakıda keçirməyə imkan verir. Qeyd edək ki, Avroliqanın pley-off mərhələsinin oyunları 23-30 avqust tarixlərində keçiriləcək. "Neftçi" də öz oyunlarını müvafiq olaraq həmin tarixlərdə keçirəcək.
