11 avqust 2012 00:54
Neftçi - oyun keçirmədən qrup mərhələsinə?
Xəbər verdiyimiz kimi, Avropa Liqasının 3-cü təsnifat mərhələsinin cavab oyunları çərçivəsində keçirilən “Anorthosis” (Cənubi Kipr) – “Dila Gori” (Gürcüstan) matçı qalmaqalla yadda qaldı. Azerisport.az xəbər verir ki, sözügedən qarşılaşma azarkeşlərin iğtişaş yaratması səbəbindən başa çatmamışdı.
Belə ki, oyun 83-cü dəqiqədə – gürcülər hesabda 3:0 öndə olduğu vaxt dayandırılıb. Cənubi Kirp klubunun azarkeşləri komandalarının 0:3 hesablı məğlubiyyətini həzm edə bilmədiyi üçün meydana axışıblar. Nəticədə meydanda xoşagəlməz olaylar yaşanıb və hakim oyunu dayandırıb.
Oyunla bağlı qərarı UEFA Nizam-İntizam Komtəsi verəcək. Böyük ehtimalla “Anorthosis” texniki məğlubiyyətə məruz qalacaq və cərimələnəcək. Yəni istənilən halda mərhələ adlayan tərəf qonşu ölkə təmsilçisi olacaq.
Lakin qitə futbol qurumunun bu olaylarla əlaqədar daha sərt cəzalara əl atması da gözlənilir. Belə ki, UEFA Kipr klublarını ən ağır şəkildə cəzalandırmağa hazırlaşır. Özü də burda söhbət yalnız “Anorthosis”dən yox, bütün Kipr klublarından gedir. İstisna deyil ki, bu ölkənin avrokuboklardakı təmsilçiləri bir və ya bir neçə illiyə diskvalifikasiya olunsun. Çünki qitə futbol qurumunun rəhbərliyi artıq uzun müddətdi bəyan edir ki, azarkeşlərin belə xuliqanlıqlarına sərt şəkildə cavab verəcəklər.
Belə bir hal baş verəcəyi halda isə Azərbaycan çempionu “Neftçi”nin bəxti gətirə bilər. Məsələ burasındadı ki, Azərbaycan təmsilçisi Avropa Liqasının pley-off mərhələsində məhz bu ölkənin klublarından biri ilə - APOEL-lə mübarizə aparacaq. Təbii ki, UEFA Kipr klublarını cəzalandırsa, “Neftçi” heç bir oyun keçirmədən birbaşa Avroliqanın qrup mərhələsinə vəsiqə qazana bilər.
Sonda bir daha qeyd edək ki, bu, hələlik yalnız bir variantdı və UEFA yekun qərarını açıqlamayıb. Yəqin ki, yaxın günlərdə “Anorthosis” məsələsinə tam aydınlıq gələcək. "Neftçi"nin APOEL-lə oyunları isə 23-30 avqust tarixlərində keçiriləcək.
