11 avqust 2012 13:26
UEFA Neftçi - APOEL matçı ilə bağlı yeni qərar qəbul etdi
Azərbaycan çempionu “Neftçi” ilə Kipr APOEL-i arasında Avropa Liqasının pley-off mərhələsindəki ilk oyun Bakıda baş tutacaq. Azerisport.az xəbər verir ki, bu barədə UEFA qərar qəbul edib.
Püşkün nəticəsinə əsasən ilk oyun Nikosiyada keçirilməli idi. Lakin püşkün nəticəsi dəyişdirilib və qarşılaşma Bakıya təyin olunub. Buna səbəb avrokuboklarda çıxış edən Kiprin iki klubunun - AEL və APOEL-in eyni stadionda oynamasıdı. AEL Çempionlar Liqasının pley-off mərhələsində ilk oyununu evdə “Anderlecht”ə qarşı keçirəcək. Belədə APOEL ilk oyun üçün səfərə yollanmalı olub.
Qeyd edək ki, “Neftçi” ilə APOEL arasındakı ilk oyun avqustun 23-də Bakıda “Dalğa Arena”da keçiriləcək. Cavab görüşü isə avqustun 30-da Nikosiyada baş tutacaq.
