12 avqust 2012 18:51
Neftçini Avropa Liqasının oyunlarına Böyükağa Hacıyev çıxaracaq
Azərbaycan çempionu “Neftçi”nin baş məşqçisi Böyükağa Hacıyev komandasının sükanı arxasına qayıdır. Azerisport.az xəbər verir ki, bir aydan çoxdu müalicə olunan təcrübəli mütəxəssisin səhhəti yaxşılaşmaq üzrədi.
Qeyd edək ki, “ağ-qaralar”ın çalışdırıcısı müalicə olunmaq üçün Moskvaya getmişdi. O, Rusiyanın paytaxtında əməliyyat olunmuşdu. Artıq Hacıyev Bakıya gətirilib. Yaxınlarının verdiyi məlumata görə, əməliyyat uğurlu alınıb və həkimlər onun vətənə dönməsinə icazə veriblər.
Dünəndən etibarən Bakıda olan məşqçi hazırda həkimlərin nəzarəti altında müalicəsini davam etdirir. Təxminən bir həftəyə Hacıyevin komandasının başına dönüşü gözlənilir. Böyük ehtimalla “Neftçi”ni Avropa Liqasının pley-off mərhələsinin APOEL-lə oyunlarına məhz Böyükağa Hacıyev özü çıxaracaq. Hansı ki, Çempionlar Liqasının oyunları zamanı onun yoxluğunda bunu köməkçisi Tərlan Əhmədov edirdi.
