14 avqust 2012 20:25
“Qazonun belə olduğunu bilsəydik, Dalğa Arenadan imtina etməzdik”
Futbol üzrə Bəhreyn yığmasının baş məşqçisi Piter Teylor sabah baş tutacaq Azərbaycan millisi ilə yoldaşlıq oyunu öncəsi mətbuat konfransı keçirib. Azerisport.az xəbər verir ki, o, öncə bunları dilə gətirib:
”Hazırlıqlarımıza Bəhreyndə start versək də, bunu son günlərdə Bakıda davam etdiririk. Səbirsizliklə oyunu gözləyirik. Etiraf edim ki, komandam o qədər də yaxşı hazırlıqlı deyil. Çünki matçın keçirilməsi üçün yaxşı vaxt seçməmişik. Hazırda Ramazan ayıdı, hamı oruc tutmağa çalışır. Buna görə də komandam o qədər yaxşı hazırlıqlı deyil. Baxmayaraq ki, Bakıya gələndən sonra bəziləri artıq oruc tutmur”.
Teylor “Dalğa Arena”da oynamaqdan imtina etmələrinin səbəbini də izah edib: “Sadəcə, bizim peşəkar futbolçularımız süni qazonda oynamaqdan istəmirdilər. Məhz buna görə stadionun yerinin dəyişdirilməsini xahiş etdik. Amma Bakıya gələndən sonra ilk məşqimizi məhz “Dalğa Arena”da həyata keçirdik. Düzünü deyim ki, qazonun bu qədər yaxşı olduğunu bilsəydik, ondan imtina etməzdik”.
Məhz stadionun dəyişdirilməsi səbəbindən öncədən 21:00-a təyin olunan qarşılaşma indi saat 18:00-da başlamalıdı. Çünki qarşılaşmanın keçiriləcəyi İsmət Qayıbov adına Bakıxanov qəsəbə stadionunda işıqlandırma sistemi yoxdu: “Mən də razıyam ki, belə bir oyun üçün başlama saatı çox tezdi. Özü də isti havada oyun keçirmək heç də ən yaxşı variant deyil”.
