17 avqust 2012 13:36
Yığmamızın qapıçısı özünə yeni klub tapdı
Futbol üzrə Azərbaycan yığmasının qapıçısı Andrey Popoviç özünə yeni klub tapıb. Azerisport.az xəbər verir ki, gənc qapıçı növbəti mövsümü “Turan”da keçirəcək.
Müqavilə ilə “Bakı”ya məxsus olan Popoviçlə 1 illik anlaşma imzalanıb. Berti Foqtsun bir müddət əvvələ qədər yığmanın toplanışlarına da cəlb etdiyi qolkiper bu yay Ukrayna klubunda baxışda olsa da, transferi baş tutmamışdı. Nəticədə, Popoviç icarə əsasında Tovuz klubunda oynamağa qərar verib. Xatırladaq ki, o, ötən mövsüm icarə əsasında “Sumqayıt”da çıxış edirdi.
Popoviçin gəlişi ilə eyni vaxtda “Turan” bir müddət öncə heyətinə qatdığı Mikayıl Yusifovdan imtina edib. İlk iki turda komandanın qapısını qoruyan qolkiper baş məşqçinin etimadını doğrultmayıb. Nəticədə, Yusifovla qısa müddətdən sonra yollarını ayıran tovuzlular onun gedişi ilə yaranan boşluğu məhz Popoviçlə doldurublar.
Maraq üçün qeyd edək ki, Yusifovun gedişindən sonra “Turan”ın “Neftçi”dən ayrılan Rauf Mehdiyevi heyətinə qatması gündəmdə idi. Amma onun yüksək maaş istəməsi keçidin baş tutmasına mane olub. Buna görə də əyalət təmsilçisi Popoviçi icarəyə götürmək məcburiyyətində qalıb.
